Hea人先生
人到中年，讀書打機炒股彈結他，搞左幾十年都唔知搞左啲咩出黎，實在悶悶地。有一次同我當時嘅女朋友，即係現時嘅老婆，去咗法國住咗兩星期，上午上堂學法文，下午先自己安排活動到處玩。呀！赫然發現原來咁樣旅行先係真正好玩。如果可以住翻一年半載就爽啦。
在香港地生活實在人多擠迫、生活苦悶，唔怪得現時啲後生仔咁鍾意去Working Holiday，去其他國家打工旅行啦。不過我地哩對中年夫婦就超曬齡，人地唔肯批哩啲Visa俾我地架啦。
好彩絕大部份嘅國家都有企業家移民或者投資移民哩類簽證，大約投資美元200,000經營一間公司，就可以在當地居住一兩年。雖然，我的青春小鳥已經一去不回來，但是，錢係儲左啲嘅。我同老婆就可以利用哩啲企業家移民計劃，自製中年人的Working Holiday！仲可以幫2歲嘅呀仔逃離高壓嘅教育環境，追求快樂的童年。
熱血太太
人到中年，做社畜都做咗十幾廿年。雖然同大部份打工仔一樣過住朝9晚6、OT繼續嘅社畜生活，但係因為做緊嘅嘢總算係自己鍾意嘅嘢，都算做得心甘命抵。再加上有慣性炒老細魷魚嘅惡習，有咩唔妥就劈炮唔撈，所以都算做得幾happy。但係壓力大就使費大，搵到幾多錢都用曬黎減壓。原本諗住有前途、無後路，一世咁樣搵錢使錢無限loop，直到無端端識到Hea人，又無端端生咗個仔，世界觀同人生嘅priority都自動改變。
初時只係拍拖黎台灣飲飲食食踩下車，有見環境優美民風純樸生活寫意⋯⋯覺得以後可以黎過退休生活。點知阿仔出世之後嗰幾個月，正值新學期開學，睇住隔個星期有學童自殺案，睇到心都寒埋。又咁啱撞到變態老闆，做到五癆七傷，Hea人覺得再做落去可能造成永久傷殘。雖然仍然可以炒老細魷魚，但係已經炒到心灰意冷，唔想再留喺嗰個圈子，甚至唔想再留喺香港咁高壓嘅環境。咁既然有幸嫁咗個有（小小）錢嘅老公，可以有機會黎台灣創業兼且轉換生活環境，仲唔走？
我地一家嘅第一站：台灣
我地就係透過台灣為港澳地區居民提供嘅投資移民計劃而獲得永久居留權嘅，哩個計劃對港澳居民好慷慨：只要投資600萬台幣，唔使雇用員工，冇規定營業額，冇規定利潤，600萬唔係使咗去，只不過係變咗公司嘅資金，左袋放入右袋，住滿一年，滿足居留條件，就可以申請入籍，入籍後亦唔會冇咗香港嘅居留權⋯⋯網上大把資料，唔響度重複嘞。但係有咩唔明亦歡迎問我地。
（註：企業家移民經常與投資移民混淆，投資移民通常是要一大筆錢去購買當地政府的債券，唔使落手落腳，搞盤生意出來）
（註二：哩項政策從2020年3月開始已經收緊咗，詳情可以睇「最新投資移居台灣要求（HF162）」）
利申：屋企有層供完嘅樓，可以說是一半靠父幹，一半靠己幹。
(Photo by Alex Iby on Unsplash)