漫長的暑假升小學入幼稚園

好快我地個 No.1 就要升讀小學嘞，而我地在台灣出生嘅 No.2 又差唔多可以報讀幼稚園嘞。今次同大家分享一下 No. 1 同 No. 2 嘅報名經歷，順便又講下No. 1 讀小學嘅情況。想知道台北幼稚園嘅情況，可以睇哩編。

岔開講少少我地細路教育嘅一啲諗法先。我同熱血太太一致認為快樂嘅童年係最重要嘅，快樂嘅人生始於快樂嘅童年。每個細路都有佢嘅潛力嘅，只要提供適當嘅環境，俾佢搵倒自己嘅興趣，佢地就自自然然去追求佢嘅夢想架啦，可以追求自己嘅夢想，就當然係最快樂架啦。學校嘅教育佔人生嘅教育重要部份，尤其是團體生活，人際關係等等，但是，學校教育不是教育嘅全部。我地搵學校冇咩特別要求，最緊要唔好要chur，翻學放在家裡面看不出來就覺得自己的臉好帥好喜歡啊？我們也可以😌便就可以嘞。所以，我地都係搵翻屋企隔離嘅小學，No. 1 就由原本嘅國小附屬幼稚園升上去就可以嘞。佢間幼稚園在下學期下半段就開始會幫佢地預備上小學嘅情況，俾佢地開始有上課下課嘅概念，仲可以坐入去小學嘅課室同小學部嘅哥哥姐姐一齊上課。可惜台灣在五月開始有武漢肺炎傳入，出現社會感染，學校開始停課，暑假提早開始。家長…… 政府現金補助每一學生10,000元。

滿額學校

No. 1 原校升讀，我地就 Hea Hea 地等學校學校通知，辦入學手續啦。點知，突然有人同我地講，我地果區啲小學學位緊張，有啲學校是滿額學校，要有優先取錄條件先至可以增加原校升讀小一機會。簡單啲黎講，就係要實際居住及設籍在同一校區，在該校區內過去連續三年持有物業或者經公證的房屋租賃契約證明，仲要有水電煤費單嘅是但一樣。萬一間學校嘅學位都唔能夠滿足曬所有嘅優先學童，就會依照學童在學區設籍先後依序分發學位。(即係做足咁多樣都未必有位啦。)

如果學校收曬哩啲優先學生後仲有位，就會開放俾其他學童，都係根據設籍時間先後分配學位。如果間學校真係冇位呢？咁就要去附近其他學校讀書啦。

嘩！臨時臨急要預備咁多文件，整唔切過喎，我地屋企附近都有兩三間小學，讀唔倒哩間就讀另外一間啦，最緊要就近屋企。我估，攞得出哩啲文件嘅人都唔會多，以我地設籍五年嘅時間，應該都排得幾前架啦。結果開出黎原來唔係No. 1 要讀果間滿額，隔離另一間姐。於是，我地No. 1 就可以好順利由間國小嘅附屬幼稚園升上去小一嘞，同一個地方翻學，適應問題就減少好多。

持居留證讀書

攞居留證嘅又會點哩？我地咁岩有朋友帶住三個小朋友剛剛到步。佢地話，今日攞倒居留證，聽日就可以翻學。當然，前題係要間學校有位啦。

No. 2 報讀幼稚園

我地個 No. 2滿4歲，可以試下報讀公立幼稚園，即係佢哥哥讀果間幼稚園啦。我地從來都冇興趣幫佢報私立幼稚園，因為實在太貴嘞，普通貴果啲圍埋平均每月兩萬幾。私立幼稚園有好多種，最常見嘅係啲美語幼稚園，佢地嘅 Selling Points 係搵一兩個白人同佢地講英文，早啲教佢地認字，認注音符號。哩啲 Selling Points 我地就唔受嘞。我地比較鍾意公立幼稚園，因為台北市公立幼稚園資源豐富，有寬廣嘅校園，午膳茶點供應營養均衡，課程跟足幼兒教育研究得出嘅結論而設計，主要是培訓幼兒自理能力，多做大肌運動刺激腦部發育，咁岩我地果間仲有主題教學，提升幼兒對世界嘅好奇心，唔會教幼兒寫字哩啲拔苗助長嘅事。最緊要係學費平到好似唔使錢咁滯。所以我地一心一意都係俾 No. 2 去公立幼稚園。

台北市無論係公立幼稚園或是私立幼稚園都係供不應求嘅。公立幼稚園嘅政策係盡量收啲五歲幼兒，可能因為六歲就要讀小一，盡量俾佢適應團體生活。我地想No. 2 四歲就入讀公立幼稚園就要啲運氣嘞。

公幼收生程序

台灣嘅公幼收生分三類幼兒在兩個階段收取。

第一類：法定需要協助幼兒，例如：原著民，中低收入戶，身心障礙，危機家庭等等

第二類：各類學校教職員工子女，足5歲且其父或母是新住民，在家中是No.3的幼兒，有兄或姐在該幼稚園或該國小讀一二年級的幼兒等等。

第三類：一般幼兒。

第一階段收生先開放俾啲高 priority 嘅幼兒例如第一類嘅。收曬第一階段嘅幼兒如果有位，就會在第二階段繼續收生。詳細睇哩度。

我地 No. 2 有 No. 1 帶挈 (讀同一間學校小一)符合第二階段優先取錄條件。於是，我就坐定粒六Hea Hea地等到時候交文件就得啦。點知臨到交表前幾日，熱血太太在佢百忙之中抽空睇下啲報名資料，原來係要交「綜合所得稅核定通知書」，即係報完稅後，稅局俾我地嘅信通知我地嘅稅率及要交嘅稅金。哩份文件係用來證明我地嘅收入。如果個人綜合所得稅率達20%(即扣除一啲免稅額後年收入超過242萬元)嘅家庭係唔會有優先資格嘅，哩啲就叫做排富政策嘞。我間Hea人公司一直都未出過糧俾我地，一直都冇報個人稅項，稅臨時臨急點叫稅局整封信出黎？No. 2 冇咗第二階段優先資格，佢個學位真係凍過水啦。No. 2 一直都好盼望好似哥哥咁翻學架麻，我地都好盼望送咗佢地翻學，就會有半日空閒時間架麻。但是，幻滅鳥！金翅仆街鳥！熱血太太嬲到出曬煙，Hea 出禍啦。

冇計啦！到交表果日，我地冇文件都照上網submit 住手上有嘅文件啦。到下晏時，幼稚園主任打電話黎問我地補資料，佢知道我地情況後，話我地可以去稅局申請張通知單，證明我地冇交報稅(即係收入少到冇必要報稅)，雖然招生文件寫明當日要交齊，原來等多一日都仲可以，真係有人情味呀！我地第二日即係晨早去稅局申請哩份文件，呵呵呵，同場都有唔少人同我地一樣要哩份文件。經過哩個小插曲後，我地No. 2 就順利抽倒個學位啦。

漫長暑假

雖然No. 1 同No. 2 新學期都有著落嘞。本來 No.1 嘅附屬幼稚園在放暑假前一兩個月會幫啲升小一嘅同學安排「幼小銜接」課程，開始模擬小學嘅上課情況，仲會安排坐入去小學教室，同啲哥哥姐姐一齊上課。可怕五月份，台灣武漢肺炎疫情爆發，幼稚園停課，小學部線上上課，No. 1 就冇得玩「幼小銜接」啦。佢嘅暑假就由五月開始，無啦啦多咗個幾月。為咗配合防疫措施，我地都要避免外出，熱血太太仲要Work from Home 幫辛康納利做 project，一家五口困响屋企，日子點過呢？

我地參考咗 No. 1 幼稚園嘅時間表，幫兩個細路製定咗個作息時間。早上學習生活技能，例如綁鞋帶寫自己名字，然後大肌肉運動跳繩，玩具時間，YouTube睇三立電視台「草地狀元」認識台灣嘅漁農業養殖業及手工業。食完午飯就再來玩具時間，然後學英文，主要睇一下啲英文故事書或用 Khan Academy Kids 學一下啲簡單併音，之後就點心時間，玩具時間，再來大肌肉運動時間，晚飯，媽咪時間，訓覺。就係咁，我就好似麥兜入面嘅黎根，run住間幼稚園，又 run 住間 Hea人公司嘞。

好彩多得台灣中央疫情指揮中心陳時中嘅沈著應對，台灣市民嘅積極配合，100 日之後台灣嘅武漢肺炎疫情由每日五百多個本地感染確診個案控制到低個位數字，什至有啲日子開始出現零確診個案。No. 1 和 No. 2 到九月可以順利開學。

幼稚園嘅翻學情況就睇哩編，小學又係點嘅哩？原來台灣小學一年級，正式上課時間係係好少嘅，每星期有四日12點放學，只有星期二翻到四點，學校會提供午餐，但係要自己帶碗筷。早上上課時段，No. 1 絕大部分時間都係見住同一個老師，語文數學等都係佢黎負責教，叫做班導，同學生相處嘅時間比香港嘅班主任更多，而且小一小二都係同一個老師，所以要認真同老師溝通，打好關係。

 一星期有四日是12點放學，如果父母都要翻工可以點樣呢？可以報學校嘅課後照顧班，放學集中去另一個班房食午餐，之後會有老師幫手睇功課，有時間剩，成班細路就可以去玩，4:00先至放學離開學校。所以 No. 1 除咗上午班嘅同學外，仲會有課後照顧班嘅同學。No.1 同課後照顧班啲同學可以能會仲熟啲，因為唔使上課，可以一齊玩嘅時間比較多。課後照顧班星期一至五可以逐日揀嘅，所以一星期內每日嘅組合都會唔同嘅。如果唔想報學校嘅課後照顧班，可以去啲私人嘅「安親班」。安親班會有職員去學校接學生放學，直接帶走，無縫銜接。

學校除咗有課後照顧班外，仲有課外活動(材藝班)，學畫畫，砌積木，做木工，樂器演奏，體育等等，最遲上課上到 6:00。所一間小學每日會有三個放學時間，12:00，4:00 和6:00。

小學放學，學生可以直接行出校門，冇好似幼稚園嘅交收手續，所以放學時間會有好多家長在學校門口等放學。到大啲時候就可以俾佢自己放學翻屋企啦。

放學翻到屋企之後，有課後照顧班嘅日子，啲功課通常都做曬，我地在家長聯絡簿簽名或印章就可以，其他日子就要自己睇住做功課啦，功課量唔多，通常半小時就會做完。

大致上就係咁。我覺得 No. 1 升到小學後，唯一唔係好夠嘅就是體育課，上完一日課都冇咩用過啲大肌肉，其實下午嘅課後照顧應該可以安排多啲運動時間。有唔少研究都顯示運動促進腦部，增強記憶力，專注力，創意等等。睇黎下學期一星期要搵一兩日12:00接走佢去做下運動啦。

(Photo by CDC on Unsplash)