台灣專業移民

近年有關部門對港澳居民投資600萬營運公司的移民渠道 (HF162) 的要求提高了不少，申請人除咗要營運間公司三年或以上，仲要僱用最少兩名台籍員工，而且申請人要對投資的行業有相關的經驗。如此一來，營運成本及門檻提高咗唔少。做咩生意，點樣做，真係要從長計議。

除咗投資移民外，其實台灣仲有好多渠道可以俾香港人及澳門人在台灣居住的，詳情可以參考下移民署所提供嘅「香港澳門居民申請在臺灣地區居留送件須知」。

喺哩度想提一提大家，要分清楚 「居留」及「定居」的分別。我地移民台灣嘅第一步是申請「居留」，獲批准之後會有一張「居留證」，在台灣住滿一段時間後，就可以申請「定居」，獲得永久的居留權。但是並唔係所有持「居留證」嘅人都可以獲得「定居」嘅。例如受僱台灣公司在台灣工作，或者自僱在台灣工作，都可以申請居留證，不過香港及澳門居民，即使持有哩類居留證，都唔可以轉「定居」，如果冇咗份工，居留證亦都冇得續，要搵第二啲方法嘞。

上面哩條 link 裡面，其實有一個移民渠道好正架，就係專業移民嘞。以專業身份移民台灣，住滿一年同樣可以申請定居，亦都可以帶埋配偶或仔女來台灣，又唔使開公司燒銀紙，承受風險。台灣政府冇明文規定咩專業，咩程度先至可以獲批，只要你有一啲專業資格，有專業證書，或者有啲專業成就等等，其實就可以試下申請。寫到好 vague，俾啲實際例子大家，以下哩幾類專業人士一般都會獲批：

• 醫生
• 護士
• 中醫師
• 測光師
• 建築師
• 律師
• 會計師

我都有幾個護士朋友（台灣稱「護理師」) ，一個中醫師朋友成功申請來台灣。如果大家唔屬於哩幾類專業人士，唔使灰心，我都有屬於其他類別嘅朋友成功獲批。佢唔係啲咩師又唔係啲咩士，而係喺大眾傳媒同文字創作方面少有成就，都可以成功申請，仲有一啲傑出嘅運動員，台灣政府都好歡迎架。所以，如果你自問有啲嘢做到叻叻地，受到大衆或者某啲機構認同，都不妨一試。幫我搞移民嗰間 Agent 都有做，有興趣我可以介紹下。

專業人士來到台灣，並唔係自動享有台灣嘅專業資格，都要考翻台灣嘅專業試嘅。不過有趣嘅係，以專業身份來到台灣居留，唔一定要做翻果行，純粹係放你入來「居留」然後「定居」。你喜歡就考翻啲試，攞翻本地專業資格，唔歡喜，做第二行都得。當然，唔等飯食，唔做嘢Hea Hea貢，又得。得咗！

(Photo by Hunters Race on Unsplash)