每年五月，大家都需要報稅嘞，但係我就好似咩都唔使做咁，有啲不安。問下公司會計師，我自己使唔使報稅呢？結果佢問翻我，請問你有冇其他收入呢？哦，係喎，我 Hea Hea 地 run 住間公司，雖然都有些少錢賺，但係都冇糧出，冇支取利潤，又冇出去外面撈散，報咩稅呢？報條毛呀？
但係喎，我每年都會收倒銀行嘅年結單，話我去年收倒幾多利息，俾我報稅用嘅。另外，在海外如果有收入，都係需要報嘅，印象中好似話每年唔超過 670萬就唔使交稅（其實哩個講法唔夠準確，下文會講下）。搬咗黎台灣住咗快要四年，感到機會處處，我有強烈嘅預感，Hea Hea 地撈落去，唔小心好有可能會發咗達，我睇都係搞清楚好啲。於是我的起心肝，買咗本台灣會計師寫嘅關於報稅節稅嘅書，釐清咗啲概念。自己做咗啲筆記，順便同大家分享一下。短時間內要消化好多新嘅資訊、概念和專有名詞，希望唔會消化不良，理解錯誤。如果當中有咩錯漏，還望各方友好指正。大家有咩具體稅務問題，一定要上税局個網睇清楚。
個人綜合所得稅
哩個類別，有 10 個細項要加起黎一齊計算，扣咗一啲「免稅額」、「一般扣除額」以及「特別扣除額」之後，得出「綜合所得淨額」，然後用累進稅率計算「應納稅額」，收入越高，稅率越高。哩十大種類裏面含括各種收入，應該是絕大部分人都要交嘅稅種。除咗「綜合所得」條大數有免稅額之外，每個細項都會有各種各樣嘅金額可以扣減，下面逐個同大家講。而根據財政部嘅公布，民國110年度（2021年）嘅稅率表係咁嘅，俾大家睇一睇，感受一下先。
「免稅額」一般黎講可以有台幣 88,000元，而「一般扣除額」可以二選一，分別是「標準扣除額」嘅 120,000元或者將一啲認可嘅支出加起黎扣減，叫做「列舉扣除額」。睇下邊條數大啲就可以選邊條，節省稅款。
| 級別 | 綜合所得淨額（台幣） | 稅率 | 累積差額 |
|---|---|---|---|
| 1 | 0 ~ 540,000 | 5% | 0 |
| 2 | 540,001 ~ 1,210,000 | 12% | 37,800 |
| 3 | 1,210,000 ~ 2,420,000 | 20% | 134,600 |
| 4 | 2,420,001 ~ 4,530,000 | 30% | 376,600 |
| 5 | 4,530,001 以上 | 40% | 829,600 |
表一：110年度（2021年）綜合所得稅率
其中表內嘅 「累進差額」純粹方便大家計算用，唔使逐個 bracket 咁計。例如綜合所得淨額係去到第 3 級，個公式就會係咁嘅：
綜合個人所得應納稅額 ( 香港稱「應繳稅款」)＝ 綜合所得淨額 X 稅率 20 % – 累進差額
跟住落黎，同大家講下構成綜合所得稅嘅 10 個細項。
營利所得
營利所得係指作為公司股東嘅股息收入（台灣稱為「股利」），包括自己經營或者合夥經營嘅公司或者合作社等組職。根據個定義，在台灣買股票嘅股息收入都應該要計埋入營利所得。哩個項目可以選擇合併入綜合所得稅，又或者抽出黎獨立課稅都可以。「綜合所得」唔高嘅人會想合併計算，除咗個稅率低啲之外，仲有 8.5% 嘅金額（最多台幣 80,000元）可以攞黎扣減應納稅額。
如果抽出黎獨立課稅，個稅率就是 28%，冇減免嘅金額。「綜合所得」高嘅人，本身已經處於比較高嘅稅率級別，例如如 30%、40%，咁抽出黎獨立課稅會比較著數。
要決定合併還是分開課稅，最終都要睇個人實際情況，最好就係分開兩個scenario黎計算比較一下點報抵啲。
想睇多啲相關資料，睇埋哩度。
執行業務所得
執行業務所得，就係指逐件計、逐單Job計嘅工作收入，有工開先有收入。好多專業人士例如律師、醫生、建築師、保險經紀、設計師、算命、音樂製作等等，都會用到哩個收入類別報稅。哩個類別嘅特點係收入可以將相關運作成本扣除，節省稅款。如果冇記數，冇keep 單據，針對每個行業稅局會有一個標準率，用黎計算執行業務所需費用。
薪資所得
薪資所得，顧名思義即係打工收入，哩個收入有佢專有嘅金額可以扣減，叫做「薪資所得特別扣除額」，唔使全部硬食。就民國110年度黎講，每人有台幣200,000元扣除額。
利息所得
理論上，存款利息都要合併到個人綜合所得計算應納稅額，但是，哩個項目有成台幣 270,000元嘅扣減額。而一啲債券嘅利息收入會被分離課稅，直接被抽 10%，唔使再合併入黎計算，所以剩低落黎會被計算嘅，就只有銀行存款利息。相信應該唔會有好多人一年嘅存款利息收入會超過 270,000元卦。
租賃及權利金所得
買樓收租嘅收入亦都會被加入綜合所得徵稅，亦可以列舉必要損耗及費用作為成本扣除。冇證明文件嘅，就可以用租金收入嘅 43%作為必要費用，即是話只有 57% 嘅收入會計入綜合收入。但係如果規模好大，有好多間屋出租，又僱用員工協助管理，就會被視為「營利行為」，要交營業稅及營利事業所得稅喇。
自立耕作漁牧林礦的所得
一睇就知係啲農民、漁民、養牛養羊哩類型嘅稅項啦。同樣，收入可以扣除成本。
財產交易所得
本來買賣房地產及股票獲利都應該算係財產交易所得，但係，股票交易所得稅曾經開徵之後又暫停，又開翻又暫停，自2016年起就冇再徵收過。而房地產嘅交易所得，於2016年又抽咗出黎於「房地合一稅」徵收。所以哩個項目好似冇咩用。
而如果在海外進行財產交易有賺錢，會有另外一個計算方法，一陣再講。
競技競賽及機會中獎之獎金或給與
參加運動比賽嘅獎金係要俾稅架，其中要付出嘅費用及成本可以扣除。政府舉辦抽獎，例如公益彩券，會獨立源頭徵稅。我有一次中咗4,000元嘅發票獎金，去銀行兌獎，結果淨收 3,600。原來獎金2,000元以上就要俾 20%税，2,000元以下唔使俾。
退職所得
哩個就係退休金嘞。有一次過提取嘅，亦都有逐年提取嘅。有哩一個項目自己嘅免稅額。哩個退職收入，應該係指在台灣嘅退職收入。在香港食長糧嘅，應該係計海外收入，不在個人綜合收入所得計算。
其他所得
哩個嘅意思即係只要有收入，冇講明話唔使報嘅，都要報啦，真係台灣人所講嘅「包山包海」。如果有涉及開支，都可以扣除。
以上咁多個項目嘅「所得」加埋一齊，就是個人綜合所得，再扣除啲「免稅額」、「扣除額」之後就是「綜合所得淨額」，再依據上面嘅表一計算應納稅額。
財政部稅務入口網有更加詳盡嘅解說，click 入去睇下啦。
所得基本稅額條例
喺我同大家討論哩個東西之前，大家千祈唔好嘗試用字面解釋哩條稅項嘅意思。哩個條例嘅設立，係要將個稅網擴大，彌補一啲過大嘅扣減額，增加政府稅收，叫咩名真係唔重要。喺哩條條例下，以下嘅六項收入要以另一條公式計算，得出「所得基本稅額」，然後再將哩個「所得基本稅額」同「個人綜合所得稅額」比較一下，如果超過「綜合所得稅額」，就要補差額。海外嘅收入嘅徾稅，就會喺哩度見倒。
| 項目 | 說明 | |
|---|---|---|
| 一 | 綜合所得淨額 | 唔使說明啦，上面已經解釋得好清楚嘞 |
| 二 | 海外所得 | 香港、澳門及海外嘅收入都算入海外收入。申報戶全年合計數未達100萬元者，免予計入；在100萬元以上者，應全數計入。記住，係以一戶為單位，唔係每人為單位。 |
| 三 | 人壽保險及年金理賠 | 如果你是一份保單嘅受益人，唔係「要保人」(香港稱投保人，即是俾錢買保單嗰個人) 果年收到保險理賠式者年金，就要計入黎呢個收入。如果是死亡嘅理賠，每一申報戶全年合計可以減除3,330萬元。 |
| 四 | 私募證券投資信託基金受益憑證之交易所得 | 私募證券 Private Equity 哩家野我就唔識嘞，亦都唔會有哩方面嘅收入，如果你有，肯定都幾有米，咁就搵自己個會計師問下啦。 |
| 五 | 申報綜合所得稅時減除之非現金捐贈金額 | 捐贈財物時可以於「綜合所得」扣除，但是，如果唔係現金嘅捐贈，哩度要挖翻出黎計。非現金嘅捐贈，金額唔係咁客觀，稅局可能怕你講到件野嘅價值好高，個人綜合所得俾咗好高嘅扣減額你，蝕咗，於是要喺哩度計一次。 |
| 六 | 綜合所得稅結算申報時，選擇分開計稅之股利及盈餘合計金額 | 「綜合所得」其中嘅「營利所得」係可以分開獨立課稅嘅，會以 28% 嘅稅率黎計稅。而家喺哩度又要挖翻出黎計。 |
基本稅額 = (以上哩六個項目加起來 – 670萬) X 20%
如果當年嘅「基本稅額」大於「個人綜合所得稅額」，咁當年就要交「基本稅額」，如果唔係，就用翻「個人綜合所得稅額」黎交稅。但是仲可以睇下有無「海外已納稅額」可以扣抵，免被雙重徾稅。
由於哩個稅項有 670萬嘅免稅額，假設一戶香港人在台灣冇收入，就可以當哩 670萬是海外收入嘅免稅額嘞。如果海外收入超過 670萬，就要開始計稅。但是，如果在台灣有收入，例如綜合所得淨額是50萬，海外收入有 640萬，要交咩稅呢？咁就要計一計數嘞。
「綜合個人所得應納稅額」 = 500,000 X 5% = 25,000
「基本稅額」= (640 + 50 – 670) 萬 X 20% = 40,000
「基本稅額」多於 「綜合個人所得應納稅額」，所以 40,000 – 25,000 = 15,000
咁如果你已經喺海外交咗超過台幣15,000元嘅税，就唔需要補哩個差額喇。
延伸閱讀：
(Photo by StellrWeb on Unsplash)