話說我個熱血太太在機緣巧合下，有工搵上門，有人搵佢幫手做一啲 project。個老細⋯⋯（就姑且叫佢做「辛康納利」先啦，雖然冇正牌辛康納利咁有型，但係都係鬼佬呀麻）辛康納利喺一間外國金融顧問公司做 partner，被外派黎台灣工作。遇到語言及文化上嘅障礙，所以想搵我個熱血太太幫幫手。香港人，對中西文化有一定了解，英語又掂，應該可以幫手減少溝通障礙。後來佢地合作開，辛康納利覺得我個熱血太太好有潛質做顧問，仲搵佢做埋其他國家嘅 projects。於是乎原本都係 part-time 幫吓手攞吓啲 petty cash，攪攪吓變咗全職外判工，條數越來越大，辛康納哩間公司要搵地方出數。但係，間外國 公司只係派人在台灣做 project，又冇 office 又冇 entity，冇得聘用熱血太太做員工，咁點出數呢？
有辦法！我地移民台灣嘅時候開咗間 Hea人公司 架麻，到而家都仲認真經營緊架。我咪可以以Hea人公司嘅名義接佢地啲外判工作，然後僱用我個熱血太太來做佢地啲 project 囉。Hea人公司收咗錢，就當然要出糧俾熱血太太啦。一來啲野係佢做嘅，錢一定要俾佢，二來啲錢留在公司，變咗營利，每年就要交多啲利得稅（營利事業所得稅），好似話要成 20% 架。所以在情在理在稅務上嘅安排，都係要用出糧（薪支）嘅方式出俾熱血太太。
咁熱血太太收咗份糧,會唔會要俾個人嘅稅項架？當然要啦，但係哩個係佢嘅問題，唔關我事嘞，在台灣搵倒食，報稅係好合理嘅。不過，參考翻之前所整理嘅台灣個人報稅，可以發現，個人綜合所得稅有好多免稅額，即使超過曬哩啲免稅額，第一個稅階都係 5%，即是假設一年有一百二十萬台幣淨收入，都係俾 12% 之嘛。好合理，佢都豪得起，何況交稅俾台灣政府，條氣都順啲呀。
問一問會計師哩個方案是否可行。佢地話，收咗外國公司嘅錢，都一樣要開發票，如果Hea人公司咁多年黎嘅收入超過支出，超出嘅部分就要支付5%嘅增值稅（VAT）。我間Hea人公司，咁多年黎嘅支出大大超過收入，真係冇增過啲咩值。收完佢地啲錢都未需要俾VAT，只不過係用做啲 Quota 姐，impact 唔大。
出糧方面，會計師話可以聘請熱血太太做正式員工，每月出糧，並且要投保以下三類保險：「勞保」，「健保」及「職業傷害保險」，另外仲有「勞退」要幫佢供。哩四樣嘢都係由政府營運嘅，供款額同個薪金掛鉤，大部份由僱主支付，亦都要扣起僱員嘅小部份薪金供款，有一兩個項目政府都會幫手供少少。
另外，除咗做正式員工外，都可以用臨時員工嘅方式出糧，上面果啲支出就可以慳翻，但係每次出糧要少於兩萬台幣。條數咁細，此路不通也。
既然係咁，就要認真了解一下熱血太太成為正式員工後，上面四樣支出嘅詳細內容，同埋對我地有幾大impact。研究完當然要同大家分享一下啦。
勞保
勞保即係勞工保險，供款額係薪金嘅11.5%。初初聽到哩個保險嘅 rate 真係俾佢嚇死。香港啲勞保嘅 rate 都係1-2% 之嘛，有咩理由台灣嘅勞保要咁高嘅呢？唔通台灣嘅因工受傷事故率比香港高10倍？後來發現，原來哩兩個保險雖然同名同姓，但係保障內容係完全唔同嘅，大家要留意。台灣嘅勞保在以下五種情況下就會賠償俾僱員，包括：生育、傷病、失能、老年、死亡。比較特別嘅係老年給付，即係當僱員達到退休年齡，就可以每月領取退休金，好似可以攞到身故為止，就即係所謂嘅年金嘞。
咁即係有儲蓄成份嘅保險啦，所以保費就要咁高嘞。哩啲保費，僱員負責供 20%，僱主供 70%，政府補貼10%。
11.5%嘅供款，對於好多人黎講會係幾 Significant 嘅比例。但係原來對於一啲未滿5人嘅公司，係唔使投保嘅。不過，近年好似在收緊中，會計師話，如果有聘請第二個僱員，就一定要投保架嘞。
僱員有勞保年金，咁公司負責人或者其他自僱人士有咩退休福利呢？有！就係國民年金嘞。當我地攞咗定居證，設咗戶籍冇幾耐，就收到一封邀請我地供款嘅信，大家可以自由選擇是否參加。我一見到話退休後可以領取年金，三年就可以攞翻個本，之後繼續攞就係淨賺嘅，二話不說就參加供款嘞。
職業災害保險
職業災害保險就真係有啲似香港嘅勞工保險嘞（Employee Compensation）。保費都係少於薪金嘅 1%，僱主負責七成幾，僱員負責兩成幾。係以下哩四個情況給付：傷病、醫療、失能及死亡。
健保
健保即係全民健康保險，先簡單介紹一下健保嘅制度先。全民健保保費都係同薪金掛勾嘅，保費率 5.17%，收入越多，保費越高，但係大家享有嘅醫療福利係一樣嘅。大家都係攞住張健保卡，行入診所醫院就有得睇醫生做手術。即係話收入高嘅補貼收入低嘅，年輕人補貼年長人。想了解多啲台灣醫療服務，就睇哩篇文章啦。
話說我份健保係以公司負責人嘅身份投保嘅。而公司負責人有好多方法動用公司資源，未必需要通過薪金去享用公司嘅利潤。所以即使公司負責人嘅薪金係零，每個月最少都要供款 1,799元，相當於月薪 34,800嘅級距。
34,800 x 5.17% = 1,799.16
而負責人嘅眷屬（Dependants），保費就會同負責人相同。每個戶籍最多供四份，第五份或以上嘅眷屬免供，即是鼓勵大家生多幾個。我地戶籍有五人，所以都享受到哩個著數。
34,800嘅薪金水平，據聞係全國自由職業者嘅平均收入，以此為準。不過，如果間公司係五人以上，負責人就唔可以以低於月薪 43,900元嘅金額投保。而且負責人嘅投保金額，一定唔可以低於任何一個員工嘅薪金。即係話如果我個熱血太太薪金多過 34,800，我地全家嘅健保保費都要隨之而提升嘞。
另一方面，熱血太太有糧出，雖然都係同我同戶籍，但係已經唔可以算係一名眷屬，要在 Hea 人公司自己投保。即是話我地冇得享受第五名眷屬免交保費嘅福利嘞。
咁熱血太太嘅保費又點計呢？有以下幾個原則：
- 健保保費率 5.17%
- 公司/單位負擔 60%，而且要負擔 1.58 倍嘅全台平均眷屬人數。
- 員工本人負擔 30%，員工嘅眷屬每人嘅供款同員工相同，眷屬最多供3人。咁第4個眷屬又點呢？答案係唔使供。
雖然健保保費率都係 5.17%，但係同負責人嘅計法又有啲唔同。公司要為員工負擔 60% 嘅供款，點解仲要再負擔 x 1.58 嘅平均眷屬人數呢？我諗咗一輪之後有以下嘅理解。為咗方便討講，我就舉一個例子作為計算方法啦。假設熱血太太份糧係每月 34,800元啦：
Hea 人公司需支付保費: 34,800 x 5.17% x 60% x 1.58 = 1,706
熱血太太 需要支付保費: 34,800 x 5.17% x 30% = 540
Hea人公司又好，熱血太太又好，啲錢都係我地出嘅姐。所以，我地每月就要俾多 2,246 元嘞。
咩叫做平均眷屬人數呢？全台灣，有啲員工係單身嘅，或者結咗婚，但係兩公婆都有做野嘅，佢地就唔會有眷屬。而有啲員工有子女，配偶全職照顧家庭，哩啲員工就會有好幾個眷屬。全台灣平均每一個員工，就有 0.58 個眷屬嘞。Hea 人公司供哩 0.58人頭嘅保費，就係同全台灣嘅僱主一齊分擔全台灣嘅眷屬嘅保費。如果啲僱主要硬食員工嘅所有眷屬嘅供款，就會好吃力，什至會專登揀啲冇眷屬嘅人黎聘用。咁樣平均分攤大家一齊負擔，不失為一個好嘅辦法。
好似我地屋企仲有三個眷屬：嫲嫲，No.1，No.2。No.1同No.2都係熱血太太嘅直係直系親屬，可以跟隨熱血太太投保，佢地每人嘅保費係：
34,800 x 5.17% x 30% = 540
佢地如果跟我（公司負責人）投保，每人就 1,799元，跟熱血太太就 540元，即是話每人供少咗 1,254 元。雖然我享受唔倒第五個或以上嘅眷屬免供款嘅福利，但係 No.1 同 No.2 嘅保費又慳咗啲喎，係唔係好有趣呢。由健保保費同薪金收入掛鉤，在一個雙職家庭裡面，好自然健保就會跟低薪嘅一方黎投保嘞。
最後，唔知大家有冇留意到，員工供款 30%，公司供款 60%，加埋就係 90%，咁仲有 10% 邊個供呢？原來台灣政府係有補助 10% 嘅。
勞退
勞退即係勞工退休金，有啲似香港嘅 MPF，但係啲錢由台灣政府統一投資管理。僱主需要為員工供款薪金嘅6%，員工可以選擇自願供款。此乃專屬賬戶，退休時就可以攞翻自己嘅供款加回報。
各勞退基金自成立以來平均約收益 4.5%（哩度仲有台灣各種退休金嘅回報資料），低於美股過去100年嘅平均回報率10%。不過，政府管理嘅基金係要保守啲架啦，唔可以訓身買曬股票嘅。參考翻香港嘅數據，HKMA 嘅外匯基金過去二十幾年嘅平均投資回報都係 4.8%，可以俾員工自由選擇基金嘅 MPF，2021年3月嘅報告顯示自2000年12月1日成立以來，平均回報都係 4.9%。星加坡中央公積金就有啲唔同，用保證回報嘅方式，有 2.5% 至 4%。都係咁上下啦。
勞退供款對於 Hea人公司黎講唔算係成本，反正都係供落去熱血太太嘅退休賬戶，第二時又可以攞翻，左袋入右袋。但係對於要聘用員工嘅其他僱主，都係一筆額外嘅開支。
總結
上述各項就係聘請員工時，除咗要直接支付俾員工嘅薪金（薪資）以外，公司每月要為該員工作出嘅供款，計算一下，比率大概如下：
勞保：11.5% X 70% = 8.05%
職業傷害保險：1% X 70% = 0.7%
健保：5.17% X 60% X 1.58 = 4.9%
勞退：6%
———–
合共： 19.65%
所以，每一份糧，背後其實要有額外 19.65% 嘅定期支出。勞動合約終止時，仲要支付資遣費，同香港嘅長期服務金/遣離費有啲似。據聞台灣啲公司都好流行在年尾俾獎金，閒閒地都要俾兩個月嘅薪金架，而哩啲年尾獎金又要補交翻以上四項供款，大家喺創業計成本嘅時候要記得計埋落去。
台灣嘅勞動部對於僱傭安排仲有好多仔細嘅規定，包括放假加班嘅加班費安排，勞工福利小組嘅設立等等。越大型、聘用越多僱員嘅公司，所需規定越多。我就暫時唔使睇住，等第時間公司大咗再去睇啦，詳情可以喺哩個網站嘅 「業務專區」搵到。