創業窮窮地，無得隨便落街唔小心買衫買鞋買化妝品嘅時候，都難免會掛住香港份糧。話說當年喺香港打一份類政府工，計月入都算係打工仔裡面嘅top 15%，福利好、假期多，唔係光宗耀祖都至少令父母放心。突然走咗黎台灣食穀種，到底為乜？個人黎講，除咗創業嘅宏圖大計，其實仲有一樣野係令我義無反顧搬黎移居台灣嘅，就係「空間」喇。
如果問你：份糧大啲好，定空間大啲好？九成九你嘅第一反應係：梗係兩樣都大啲就最好啦！而且喺香港的話，你份糧有幾大（貼切啲講應該係你幾有米，即是有啲人其實可以有米到唔志在份糧㗎嘛），通常就決定咗屬於你嘅空間有幾大。拿，你又準備窒我喇：使乜你講，有錢住間屋就梗係大啲啦。無錯，你啱，而且事實遠遠唔單止係咁，所謂「屬於你嘅空間」，唔止話你屋企有幾大咁簡單，亦唔止話你名下有幾多物業舖位，而係包含咗你喺哩個城市裡面甚至哩個地球上面你可以自由活動嘅空間。睇到哩度，你又可能：哇哇哇！有冇咁誇張呀？！其實係冇誇張到嘅，舉幾個簡單例子就即刻明晒。
喺香港，一般打工仔返工，唔係逼巴士就係逼地鐵，你同身邊個個人都有肌膚之親，完全無個人空間可言。有錢啲嘅可以養得起部車，或者負擔得起每日搭的士call Uber，雖然好可能一轉車要兜晒三四個人返工返學，但係至少每個人都叫做佔返一席之位。再有錢啲嘅，老公一部車，老婆一部車，司機一部車接送少爺小姐返學再送埋姐姐去買餸……即刻寬敞晒舒適晒。再講放假消遣，少啲錢就去屋企附近公園商場行一轉，提早兩個鐘排隊攞籌去間坐低同隔離檯屁股貼屁股嘅屋邨酒樓食個晏。寬裕啲就落下銅鑼灣，搭車揸車去下郊野公園——雖然都係同人逼。再有錢啲，當然就可以遠走高飛，趁weekend黎台北食下夜市，去曼谷做個spa。仲有啲根本就唔使返工出糧，世界任我行嘅……再講有乜頭暈身㷫要入廠，到底你係喺政府醫院訓大房（或者走廊），喺私家醫院訓大房，抑或訓單人房，你所佔據嘅空間，全部都可以一呎一呎計出黎。
係唔係好灰呢？Well，咁香港係山多地少、人口稠密丫嘛，堅尼系數係高丫嘛，貧富差距係大丫嘛，無錢真係慘丫嘛⋯⋯
咁，如果唔係喺香港呢？
利申再利申，我地係靠住上一輩嘅福蔭（即係喺香港有樓收租囉），黎到台北先可以住豪宅嘅。好多時，台灣朋友問起我地間屋幾錢租，我地講個數字出黎嘅時候，佢地都哇哇聲覺得好貴，有一個仲話我地用咗佢成份糧去租屋。之前Hea人都有提過，為咗BB嫲嫲——亦即是我地嘅金主——可以比較容易適應喺台灣嘅生活，我地要搵啲接近香港規劃同管理嘅屋苑，所以一般本地人會住嘅公寓啦、單棟電梯大樓啦，我地通通都無考慮，而且都係儘量搵新樓，儘量要裝修得靚靚仔仔（我地屋苑大堂有藝術雕塑架！！），唔好等BB嫲嫲有生活水準下降嘅感覺。所以呢，我地屋企嘅生活空間可以話係用高價買番黎嘅，但係扣除香港屋租收入之後，我地喺台灣就只係兩個剛剛開始創業，無穩定收入，要慢慢搣啲積蓄黎養一家大細嘅中年人。簡單啲講，即係要慳啲使啦。
咁，有無覺得好慘呢？
鏡頭一轉，時間返返去幾年前，我地剛剛決定移居台北，安排咗一個short trip黎視察環境。因為有本地朋友推薦，我地就過黎哩區睇下，咁啱需要坐文湖線，可以睇下週遭環境。沿路經過望見都係啲殘殘舊舊、灰灰黑黑嘅公寓，只係偶然有一兩棟新樓，搞到我同Hea人都有啲頹頹地，心諗係唔係落錯注。點知經過某個站之後，部車減速掟咗個大彎，突然眼前一亮，一個有山有湖藍天綠地嘅大公園，就咁攤喺我地面前，景觀十分開闊怡人。但係最最緊要嘅係，咁啱當日係星期日，湖邊大大片草地上面有唔少人，多數係啲父母帶住細路，又或者係三五成群嘅後生仔，個個帶塊野餐墊，或者搭個簡易帳篷仔，坐嘅坐，瞓嘅瞓，食嘅食，啲細路就四處跑、吹波波、追狗仔⋯⋯哇！簡直就係我細個睇書睇電視講郊遊、講家庭樂嘅畫面呀！！
係嘅係嘅，你喺香港一樣可以做哩啲，但係自問你有幾耐無試過（或者幾時有試過）喺維園或者九公野餐先？又有邊次假日去沙灘或者去郊野公園燒嘢食係唔使煩泊車、唔使趕住霸位、霸爐先？
我仲記得當時望住個公園，心裡面已經拍咗板要住哩區，住落亦的確成日帶啲細路黎野餐、瞓草地。但係，再後來，先發現哩啲公園、哩啲環境，連台北市內都大把，更唔好講其他城市，而且基本上唔使逼、唔使錢。
除左反映喺住屋同消閒，哩個差別亦都反映喺日常生活嘅其他方面，例如搭公共交通工具無咁沙甸魚、出街食飯好少需要搭檯、搵車位唔會難過中六合彩，等等。我自己覺得最「震撼」嘅一個例子係，話說某次Hea人需要去台大醫院訓兩晚，住健保房。咁大醫院就梗係人來人往十分繁忙啦，所以我地都預咗間房會訓六至八個人，點知去到竟然係雙人房，出院埋單三幾千⋯⋯台幣！咁我以為係佢死好命執到支好籌啦，於是就喺啲本地朋友面前吹噓下，結果朋友都話佢住雙人房運氣好好，因為：「平常健保房都是三人房耶！」吓？咩話？三人房？健保房？我個下巴幾乎跌咗落地。
扯到咁遠，其實係想講，空間哩樣嘢，有啲地方用錢都好難買到，有啲地方唔使錢就有。喺窮窮地無乜閒錢可以使嘅情況下，我地喺台北嘅生活都並唔係好慘，好大程度係因為人口密度比香港低，可用空間比香港多，所以好多服務、消遣、享受都唔使額外俾錢。唔好講其他啦，淨係行出街抬高頭可以望到個天，而唔係望住大廈外牆、人行天橋、高架路⋯⋯對於我黎講已經無價。所以你問我：掛唔掛住份糧，我會答你：掛住。但係你問我會唔會返轉頭，答案一定係：不了。
(Photo by Rovin Ferrer on Unsplash)