如何保留香港電話號碼

移民咗台灣後，仲使唔使保留香港手提電話號碼呢？我個熱血老婆一到埗冇幾耐就 Cut 咗嘞，一來佢覺得無必要留住，二來佢算係果啲成日轉電話號碼嘅人，對個號碼無乜留戀。而我個電話號碼用咗廿幾年，後來仲用來做生意，有好多人嘅電話簿上都記錄咗我哩個號碼，所以唔單止要 keep 住，仲要佢地可以打哩個電話時搵倒我。唔係個個人都知我移咗民，仲未必個個人都有智能手機、用 WhatsApp 架麻。

要响台灣收香港電話，冇理由開住個 Roaming 聽咁貴架麻，點樣做可以平啲呢？以下係我嘅經驗。

第一步，在香港申請一個 Skype account。

第二步，响哩個 Skype account 買一個香港嘅電話號碼，有得揀號碼架，不過就一定係 8 字開頭。一年費用都係港幣四百蚊，可以接收無限量通話。

第三步，冇人知道我有個新電話號碼架麻，所以要將自己用開嘅電話號碼飛線落去哩個 8 字頭號碼度。識唔識飛線？假設你個 Skype Number 係 88887777，拮住香港張 SIM card，响自己電話上面㩒 **21*88887777#，然後打出就得架嘞。

第四步，在手機或電腦上裝 Skype 個 App，無論你在地球邊一度，只要有 Internet，登入後就可以用 Skype 接收打去原本香港個號碼嘅電話嘞。

以上哩啲步驟，最好在香港完成，尤其是第一步。响台灣開 Skype account，就會變咗台灣嘅 Skype，個 interface 唔同曬，我搵咗好耐都搵唔倒點樣買 Skype Number。如果人已經飛咗過來台灣，就只好搵香港朋友幫手開 account。飛線方面，可以上香港電訊公司網站用搖控飛線。

哩個方法嘅費用大約係：

• Skype Number 一年HK$405
• 香港電話號碼一年約 HK$20 x 12 = 240

香港電訊公司每兩年都會打電話俾我叫我簽約，我每次都會同佢講要最平嘅 Plan。佢每次都會唧啲平少少嘅Plan 俾我。而家應該減到每月少過HK$20嘞。

如果要打電話翻香港就要俾錢嘞，最 flexible 嘅 plan一分鍾都係HK$0.25。當然，用 WhatsApp call、FaceTime audio 哩類就唔使錢，有 internet 就得嘞。

講開 WhatsApp，雖然我而家手機拮住張台灣 SIM card，但係只要我養住個香港電話號碼，都可以用哩個號碼收WhatsApp message。當 WhatsApp 知道你有新 SIM card 新號碼，就會問你要唔要用新號碼黎做 WhatsApp，記得揀「唔要」呀。台灣人比較鍾意用 Line，個台灣電話號碼冇 WhatsApp 都冇問題。

有時銀行會用 SMS 發一啲保安嘅短訊，香港匯豐銀行都會接受台灣電話登記架。但係 PayMe 就唔得嘞，一定要用香港電話號碼登記，有時要登入就要換翻香港張 SIM card 入去，好煩架，尤其是而家啲 App Store 已經分咗地區，台灣區嘅 App Store 係冇 PayMe 嘅。所以如果朋友要轉錢俾我，都係用「轉數快」 FPS 算嘞。

如果真係想長期拮住香港張 SIM card 就可以用雙卡機嘅。而家 iPhone 11 都有雙卡機啦。但係大家要留意嘅係，响香港買嘅 iPhone 11 先至可以拮兩張 SIM card 入去，台灣買嘅 iPhone11 淨係可以一張  Virtual SIM, 一張實體SIM。而家台灣啲流動電話商都有 Virtual SIM 嘅選擇，應該問題不大。

講完。

(Photo by Pavan Trikutam on Unsplash)