住咗喺台灣三年以上，都係時候講下台灣啲醫療服務嘞。
我地對香港嘅醫生護士係充滿信心嘅，所以原本打算留住香港嘅住院保險，有咩事都可以飛翻香港醫。後來注意多咗，先至發現原來台灣嘅醫療同香港比起上黎，一啲都唔差，價錢仲哈哈哈⋯⋯平到笑呀。所以，我地一攞倒張身份證，肯定自己有永久居留權之後，就即刻 cut 咗香港份醫療保險。果啲賠償現金嘅危疾呀、人壽呀，就暫時 keep 住先。
點解開始覺得台灣醫療技術勁呢？
仲記得 2010 年菲律賓人質事件後，有受害人下顎被子彈打傷，香港醫院雖然救翻佢條命，但係對被毀的容貌則束手無策，受害人嘴巴只有五毫子咁大，只能戴口罩外出。後來佢黎咗台灣做手術，重建顎骨，令佢可以過翻正常生活。
另外， 2015年底台灣已經有非常先進、醫治癌症嘅質子機（Proton Therapy），而香港嘅質子治療中心，聽講會响2020年開幕。執筆時已經係2020年11月，好似仲未有聲氣。
據聞台灣醫療技術好，係有佢歷史原因嘅。我有個做律師嘅鄰居話，台灣嘅華人在日治時期，係唔可以讀法律，唔可以掂政治嘅。當時比較有前途嘅出路，就係去習醫。久而久之，華人精英都走咗去做醫生，形成咗一個傳統。啲叻人都去咗行醫嘞，台灣醫療水平自然高。有趣嘅係，到今時今日，唔少台灣醫生醫而優則仕，去咗做官，好似上一任副總統陳建仁，就係一名流行病學專家。今次可以將武漢肺炎擋在台灣門外，哩個政府團隊真係功不可沒。
所以呢，台灣啲醫療技術一啲都唔差架。
咁醫療技術好，費用又如何呢？
台灣由1995年開始實施全民健保制度，所有市民都可以參加。即係全部台灣人一齊同同一間國營保險公司買保險，保費同戶籍主人嘅收入掛勾，收入越高，保費越高。僱主要幫僱員供一大部分，自由職業者收入難以計算核實，保費則以全國自由職業者的平均收入為依據去計算。我地投資移民，屬於一間公司嘅負責人，如果冇出糧俾自己，都係用自由職業者嘅方式去計算，大約每人每月保費台幣1600元。為咗鼓勵生育，戶籍中第五個或以上成員享有保費豁免。交咗哩啲保費之後，就可以去一啲參加咗健保制度嘅診所或醫院接受治療，醫藥費健保署幫你出一大部份，自己出小部份就可以嘞。並唔會因為保費俾咗少啲而獲得少啲嘅保障，算係一種財富再分配嘅社會福利制度。因為全台灣絕大部份人都有健保卡，所以都冇咩診所唔接受健保卡，唔係就唔使做生意嘞。之不過，嗰啲質子治療機咁貴，健保就應該唔會包架啦。
以上哩啲都係一啲公開資料，大家可以上網搵倒，我跟住落黎同大家分享下我响台北睇醫生嘅一啲親身經歷。由於我地要住夠半年先至可以攞倒健保卡，所以，分成冇健保卡時期及有健保卡時期兩部分黎講。
冇健保卡時期
生仔
我個熱血太太係陀住 No. 2 移民，黎到台灣先至生出黎嘅，佢就揀咗間豪華嘅婦幼診所生，詳情就睇哩兩篇啦。咁豪華嘅生仔服務，健保淨係會包小小嘅姐，所以未有健保卡都冇咁蝕。
門診
我地住喺台北市比較外圍嘅住宅區，除咗通街係補習社外，診所都唔少嘅。哩啲診所，唔係小兒科，就係啲耳鼻喉科呀，眼科呀，婦科呀咁，就係冇普通科、內外全科或者家庭科，有時仲會列出佢地專醫啲咩症咁嘅。當然，全部都會接受健保卡。不過，我心諗我唔舒服，未必知自己咩病架，我行入間診所，如果唔係佢醫開果啲病，咁點算呢？後來朋友推介，去咗間小兒科診所睇門診，原來有咩傷風感冒頭暈身㷫都可以搵佢醫。我有食開啲降膽固醇藥，都可以搵佢開。即是哩啲專科醫師，好多都會睇埋一啲常見嘅病症。例如，耳鼻喉科醫師，睇埋傷風感冒都好正常，小兒科醫生睇埋大人都唔出奇，當然，我一名 Hea Hea 大叔就唔會行入去間婦產科診所睇醫生啦。
第一次去看診時，通常會有以下哩啲對話：
姑娘：「健保卡。」
我：「沒有健保卡。」
姑娘：「要先付按金，四天內帶健保卡來退回。」
我：「我們剛剛搬來住，沒有健保卡。」
姑娘：「⋯⋯」(hang hang 地機)
我：「我可以付全費，不用健保卡嗎？」
然後，姑娘會露出不可思議的表情打電話問醫生，跟住就好唔好意思咁同我地講，要800元台幣（驚我地覺得貴），而我地就會好順攤咁俾800元佢。如果你唔想嚇親啲姑娘，最好一入去就同佢講自己係新移民，要半年後才有健保卡，麻煩佢問下醫生「全自費」要幾多錢。
我睇醫生都係揀閒日翻工時間，通常等5至10分鐘就有得睇，再等一陣就會有藥攞，一般都係開三日藥，啲藥會分開一餐餐用一個個細袋仔裝好，搣開一次過放入口搵水沖落個肚就得啦。如果帶BB去睇傷風感冒，佢地會有部好大部嘅吸鼻涕機，幫啲BB抽下鼻涕，等佢地舒服啲，藥就會分開一餐餐磨成粉，方便加水餵啲BB。
台北市嘅診所門面裝修有新有舊，我比較鍾意啲新少少嘅診所，除咗感覺好啲之外，醫生通常比較後生，我比較鍾意啲後生啲嘅醫生，可以同佢地討論一下病情同用咩藥。
台北除咗通街都係醫生牙醫之外，如果你有試過在台灣自駕遊去宜蘭玩，就會發現成條高速公路都係醫生。點解呢？因為連接台北市和宜蘭嘅5號仔高速公路，又名蔣渭水高速公路（同蔣介石冇咩關係），是台灣日治時期嘅社會運動家，其實，佢都係一個醫生，你話係唔係成條高速公路都係醫生呢？（爛 gag，大家無須太認真）
喺我未攞倒健保卡之前，上天仲安排咗我試埋冇健保卡嘅情況下睇牙醫。話說有一晚，我好開心食緊一嚿好香嘅豬腩肉，突然聽到「啪」一大聲，真係好大聲！原來係我強勁嘅咬合力，咬到一塊豬骨碎片。感覺不妙，即刻連啖飯都唔敢吞，用條脷檢查一下啲牙有冇事。覺得有隻牙怪怪地，於是即刻過去對面間大牙醫診所求救。佢地應該有幾個牙醫在診所做緊野，後來有一個牙醫得閒，幫我檢查，發現有隻臼齒裂開咗，佢一撥隻牙就有塊碎片跌咗出黎，用鏡一照直情見倒曬啲琺瑯質、象牙質、神經線，好似啲教科書嘅牙齒結構切面圖咁。嘩！如果唔即刻處理咗佢，果晚都唔知點過。照完 X 光後，確認隻牙仲可以留住，將來可以做個牙套包住佢，好似戴住頂安全帽咁。不過，當務之急係要即刻杜牙根（台灣叫根管治療或者叫抽神經），等佢唔會發炎。喺冇健保卡嘅情況下，杜牙根要幾多錢呢？要睇隻臼齒有幾多隻腳。有啲有三隻腳，有啲四隻，每隻腳盛惠 NTD2,000。我哩隻臼齒有三隻腳，所以要俾 NTD6,000。如果有健保卡，哩NTD 6,000就可以慳番嘞。杜牙根其實都幾多步驟，去診所三四次先至可以完成。要確保哩啲神經組織抽清曬，如果唔係，最後封住咗隻牙先至黎發炎，又要鑽開佢就會又麻煩又痛苦，哩6000都係抵俾嘅。
杜完牙根後，如果想隻牙冇咁易碎，就要整個假牙套套住佢，又要攪一兩個月，好多步驟，哩度唔講咁多嘞。牙套有平有貴，最貴應該係大約NTD 20,000。哩一 part 健保就唔包嘞。我揀咗金屬套外面再燒瓷嘅假牙，用咗兩年後，有一個角崩咗。可能當時牙醫幫緊我呀媽整緊牙，係一單大生意黎架，所以佢竟然免費幫我換過一個純燒瓷嘅假牙。佢話正常使用應該唔會咁，當係保用期內免費更換，不過未必個個牙醫都係咁架。咁又要整一兩個月。哩隻純燒瓷假牙有個位非常之薄，俾我有一次食蘋果時咬裂咗，於是我又要另外換一隻全金屬嘅假牙。從鏡中睇住哩隻銀色嘅假牙，從此以後，我就再唔係一個純 Organic 嘅個體啦，邁出成為半人半機器Cyborg嘅一小步喇。
以下係一啲牙醫嘅收費標準
https://805.mnd.gov.tw/download/guide/06charge_data03.pdf
http://www.hc.mmh.org.tw/object/Downloads/3402download_address.pdf
相比香港，响台灣全自費整牙其實好平，如果唔係因為整一整牙要去診所四五次，其實香港嘅朋友可以黎台灣整牙。
有健保卡
在台灣住咗半年冇出過境，就可以申請健保卡。我地張健保卡嘅代價就係每月每人固定要俾千幾蚊台幣嘅保費，但係每次睇醫生淨係需要俾「掛號費」大約 NTD200，即使要驗血都唔使額外加錢。除咗一般人最關心嘅門診，仲包埋牙醫、中醫、物理治療、住院、手術、長期病等等，針對唔同年齡嘅人，定期有免費嘅驗身服務，真係抵到爛。
拿住張健保卡，除咗平時用黎睇門診外，我地仲去咗兩次大醫院，值得同大家分享一下。我地個 No. 1 在香港出世時已經發現咗有腎盂漲大嘅情況，經診斷後，建議如果冇咩事就無需跟進。有一日，我個熱血太太唔知點解有啲擔心，於是上網掛個號，約咗時間去馬偕兒童醫院睇下（詳細醫院點樣排隊可以睇哩篇https://www.hk2taiwan.com/2020/台北湊細路（一）/。醫師了解情況之後，好自然就安排照個超聲波啦。咁啱下午就有得照嘞，我地到時候就去咗照超聲波間房門口等，好似都係嗰個醫師親自照，照完曬即刻再去診室等醫師講下有咩診斷。原來 No.1 個腎已經冇曬事嘞，推斷係佢條輸尿管出世前長咗少少，彎彎曲曲咁，啲尿去膀胱唔係去得咁順，谷大咗個腎盂。而家佢長大咗長高咗，輸尿管拉直咗，就唔會谷住個腎盂嘞。我其實幾 impressed 在一日之內，在同一個地方，可以做咁多嘢仲有埋診斷，費用好似都係兩三百（隔太耐唔記得實際數字啦）。有咗哩個診斷，我個熱血太太放心曬。
另外一個住院嘅經驗係整耳仔。不過我講之前，希望大家唔好笑鳩我低能。話說台北嘅冬天係好潮濕嘅，而我沖涼時，好鍾意向住個花灑沖面，任由啲水流入耳仔。我心諗耳仔入咗水，啲水自然會揮發咗去架啦。而事實上，的確係會嘅，不過要好耐之麻，到啲水揮發得曬時，在咁溫暖濕潤，咁受保護嘅環境下，微生物當然生長得非常茂盛，所以我耳仔成日會好痕，有時順手就會攞支牙籤去撩耳仔，越撩越入，就篤穿咗個耳膜嘞。本來我都唔知㗎，因為對聽覺影響其實唔係好大，不過有一次隻耳仔真係好痕，走咗去睇醫生，畀醫生見到真係穿咗個窿。佢話冇咩嘢都唔使整嘅，但唔可以游水，因為冇咗耳膜隔住，啲水入咗去，就好容易中耳炎。
講到哩度，大家記住唔好學我喇，千祈唔好咁樣撩耳仔，最多用棉花棒，伸入少少吸乾啲水就好啦。如果覺得有耳屎阻礙聽覺，哩度啲耳鼻喉科醫師有部機器，可以幫你清佢出來。我呀媽都試過幾次，好方便架。
我後來的確間中會中耳炎，有膿流出來，何況唔整翻耳仔就冇得游水，所以，我都係決定搵個機會整咗佢。哩度啲診所唔興寫轉介信，要去醫院做手術，就要自己去醫院掛號睇門診，然後安排時間入院做手術。我問睇開嘅醫師，佢係台大畢業嘅，就叫我自己去台大醫院耳鼻喉科掛號，真係完全冇興趣寫轉介信。上台大個網站掛號啦，都唔知搵邊個醫師，而且全部都係滿額嘅。見到有個醫師都係睇耳仔，似似地嘅，等第二個工作日一開始，上網就有得 book 新開放出來接受預約嘅時間，都係要一個星期之後，有啲似以前香港 book 羽毛球場。
台大醫院真係好大，有西址，東址，兒童醫院。我好辛苦咁搵到西址果邊入咗去，好似迷宮咁，搵極都搵唔倒個耳科門診部，樓底又低，空氣又唔好，好似入咗個 Food Court 咁。點解咁大間醫院，成個 Food Court 咁架，正在對台灣嘅醫院開始失去信心之際，我發現自己原來真係入咗去人地個 B1 餐廳區囉，咁就梗係似 Food Court 啦。後尾上咗去一樓，先至發現原來佢係一個好古老嘅建築物黎，感覺有啲似香港大學本部大樓。搵倒診症室，插入建保卡報到，等咗一陣就入去見醫生嘞。結論都係可以做耳內視鏡微創手術補耳膜，不過唔係哩個醫生做。佢寫咗張紙俾我去對面房見「總醫師」約時間直接排期入院，前一晚見一見個 Surgeon，第二日就可以做手術。
聽倒話見總醫師，我心中暗喜，約個時間都要見總醫師咁高級。入到對面房，見倒兩個小妹妹坐在一張疊滿咗文件嘅枱後面幫我約時間。哦！總醫師邊度咁容易俾我見呀，原來係見佢個秘書架咋下！但係後來台灣朋友話我知，兩個小妹妹其中一個應該真係總醫師黎架。總醫師其實係做啲行政雜務嘅醫師，好多時都係由實習醫師做嘅，所以有青春嘅小妹妹醫師。佢問我想住健保房，還是想加些少錢住啲好啲嘅房。錢就唔使加好多嘅，但係，為咗可以令大家了解多啲台灣嘅醫療服務情況，我就幫大家親身試吓啲最 Basic 嘅 Basic Plan，睇下啲健保房係點嘅。萬一環境差，都係捱三日姐，我都係做一做耳膜手術，應該都冇問題嘅。
Mark 咗日子嘞，都要等5個月。總醫師將啲入院須知等等放去一個大公文袋俾我，話到時候去邊度出現就可以。有一樣要注意嘅係，手術期間，一定要有家人在醫院，可能因為要全身麻醉，有咩事都要有家人在場簽名。手術之後住院，護士（台灣叫護理師）對病人嘅照顧只限打針派藥等同醫療有關嘅事，食飯沖涼等等就要病人自己攪掂。我做完個全身麻醉嘅手術，醒翻驚我企唔穩，全日都要屋企人陪住。如果屋企人唔得閒，醫院可以幫病人 Book 個私家看護。我雖然比較 Hea，都係補個耳膜姐，唔使請私家看護嘅。
Fast forward 到入院果日啦。熱血太太陪我去到辦入院手續個大廳報到，即刻有一連串嘅檢查要做，包括抽血，照X光，攪掂曬先至叫我地自己上病房。入病房前集中做完必要嘅檢查，Streamline 咗啲步驟，感覺上都幾有效率，唔使入去病房之後再走來走去做唔同嘅 Test。去到個 Ward，護理師再問我一大堆醫療病史，真係一大堆，仲要睇吓有啲咩藥物敏感。最後，終於俾個床位我啦。大家估下，唔使加錢嘅健保房，一間房有幾多張病床？係兩張床呀！我仲諗起碼都要十個八個病人啦，原來得兩個人咋。地方就舊舊地啦，照明唔係好夠，不過都算乾淨。
我响病房安頓落黎後，我個熱血太太就要翻屋企睇住 No. 1 同 No. 2。對住兩隻 BB 獸，嫲嫲一個人唔知道可以支持幾耐。一諗到第二日做完手術，仲要熱血太太留在醫院，諗諗下都係想搵個看護幫手，等佢第二日可以早啲翻屋企接力。可惜太遲嘞，啲看護已經被 Book 曬嘞，真係唔係話要就一定有。
熱血太太翻咗屋企之後，跟住就有兩個女醫師黎見我，又搵個鏡望下我個穿咗窿嘅耳膜。而家諗翻，有可能就係果兩個年輕嘅總醫師，唔知點解要見我，可能覺得我靚仔。最後，做手術個醫生終於都出現啦，佢個氣質唔同曬，非常之 Calm，唔係太多野講。佢又再望下我個耳膜，然後同我解釋手術嘅程序。大概就係响我身體某個部位攞塊膜，然後用內視鏡伸入去個耳仔入面，清咗耳膜個窿邊邊啲死咗嘅組織，再將我果塊膜黐上去，等耳膜啲組織可以生埋一齊。生下生下，三四個月後耳膜就會生埋，將我果塊膜消化咗去。
第二日一大早就係我做手術嘅時候嘞，醫院唔俾我自己行去手術室個啵。於是呢，我就要坐响輪椅上面，由熱血太太將我哩件80kg嘅肉體推去手術室門口嘞。入咗去之後，做個全身麻醉，就咩事都唔知嘞。
到我醒返嘅時候，我已經返到自己張病床嘞。隻耳仔塞住咗啲藥，個喉嚨乾乾地。下午起身去屙尿嘅時候，發現唔係好暢順，我正在懷疑係唔係有人趁我全身麻醉嘅時候去攪我個何B仔，熱血太太就話麻醉藥未去清，身體會有啲地方唔聽話架，我算好架啦，唔使插尿喉，仲話佢開刀生完 No. 1 同 No. 2 嘅時候都係咁架。一個人去到一個新城市，自然疑心係會重啲嘅。
住咗三日醫院，做咗個手術，用健保卡嘅情況下，埋單幾多錢呢？好似 NTD 3000-5000 咁上下，我都唔記得啦，因為實在太平喇。我對健保房都非常之滿意，同我同房嘅一位大叔，雖然同佢冇咩兩句，但係佢都好尊重大家需要安靜嘅環境休息，唔會响房內開手機睇電視，需要講電話嘅時候，都會走出去外面講，所以，住院三日，過得唔錯。伙食方面，醫院病房雖然話有得訂餐，但係啲護理師好似唔係好鼓勵我去訂。好彩我行得走得，可以去 B1 個 Food Court 食飯。
出咗院後翻去覆診三四次，包括拆傷口 dressing，檢查耳膜生長情況，驗聽力(有改善)。而家都一年有多，好翻曬！
(Photo by Marcelo Leal on Unsplash)