上回講到因為種種原因，我開始load番移居台灣哩個background job出黎，但係我老婆就唔係好捨得佢份糧喎。一來佢要俾家用娘家，二來一直都係大使怪，冇咩儲蓄習慣，想趁呀仔未讀小學前打多幾年工，儲翻啲彈藥，去到台灣就唔再打工，諗住憑我地兩個人嘅能力，俾啲時間，點都可以開創倒個小企業養家嘅。
點知呢呢呢，佢自己身痕轉咗去個新 Department，每日出門口前都苦口苦面話唔想翻工。我老婆嫁著我哩個Hea人，唔通想同我鬥Hea？非也，原來佢新 Department 個老細係變態嘅。上手個同事做咗十幾年都頂唔順要起身走人，佢先轉去接手，可想而知哩個老細有幾難頂。跟住佢話翻工時飲完杯奶茶後，個肚會咕咕叫得好勁，初時以為係乳糖不耐，後尾問一問醫生，原來是工作壓力引致的大腸激躁症，可以食血清素治療。嘩！我當堂嚇咗一嚇。一個人因為情緒及壓力的影響而引致生理上嘅反應，情況實在相當嚴重，再咁落去容乜易造成永久創傷。我一心諗住一齊去台灣大展身手架嘛，萬一有事埋仲難適應新環境？咪嘞，都係早啲出發。我地仲未老，承擔倒創業失敗嘅風險，我呀媽仲行得走得，可以幫手湊孫，呀仔仲未讀書，唔使適應新學校，而家唔走仲等幾時？
當時又啱啱睇咗套戲，The Secret Life of Walter Mitty (2013)，故事中的男主角開始時經常陷入自己的幻想世界裡面，唔肯踏出一步去實踐自己嘅理想。我同老婆成日諗諗諗，冇去踏出第一步，好似俾套戲笑鳩緊呀。我小呀！當你真心想做一件事，成個宇宙都會幫你架。
為咗壯下膽，我上去美國中央情報局嘅 The World Fact Book (唔係 Facebook 喎) check 下台灣嘅基本資料，始終，去旅行同搬去住係有唔同嘅。
| 台灣 | 香港 | 南韓 | 馬來西亞 | |
|---|---|---|---|---|
| GDP/Capita (OER) 官方匯率 (2017) | USD24,292 | USD46,080 | USD29,938 | USD9,755 |
| GDP/Capita (PPP) 購買力平價 (2017) | USD49,827 | USD61,016 | USD39,387 | USD29,100 |
| GDP增長率 (2017) | 2.9% | 3.8% | 3.1% | 5.9% |
| 通脹率 (2017) | 1.1% | 1.5% | 1.9% | 3.8% |
| 失業率 (2017) | 3.8% | 3.1% | 3.7% | 3.4% |
| 貿易差額 (2017) | 348.9B - 269B = 79.9B | 537.8B - 561.8B = -24B | 577.4B - 457.5B = 119.9B | 187.9B - 160.7B = 27.2B |
| 財政盈餘(2017) | -0.1% of GDP | 5.2% of GDP | 1.4% of GDP | -3% of GDP |
| 公共債務 (2017) | 35.7% of GDP | 0.1% of GDP | 39.5% of GDP | 54.1% of GDP |
| 嬰兒死亡率 (2018) | 4.3 /1000 | 2.7/1000 | 3/1000 | 12.1/1000 |
| 平均壽命 (2018) | 80.4 | 83.1 | 82.5 | 75.4 |
| 堅尼系數 | 33.6 (2014) | 53.9 (2016) | 35.7 (2016) | 46.2 (2009) |
| 貧窮率 | 1.5% (2012) | 19.9% (2016) | 14.4% (2016) | 3.8% (2009) |
| 標普信貸評級 | AA- with stable outlook | AA+ with stable outlook | AA with stable outlook | A- with stable outlook |
哩一大堆數字，要有比較先至會有感覺，所以我專登搵同台灣差唔多size嘅南韓及馬來西亞比較一下。另外，本來台灣哩個大島（36,193km^2）包含了城市與鄉村，係唔應該攞來同香港（1,106km^2）哩個城市比較嘅，但係，在香港住咗咁多年，將香港的數據列埋出來，自己先至會有啲概念。
台灣嘅人均生產總值以官方匯率計，每年24000美元以上，達到OECD國家嘅水平。以Purchasing Power Parity計算，即是計埋當地嘅物價指數，哩24000美元其實在當地有接近50000美元的購買力。有趣的是，雖然南韓的人均生產總值以官方匯率計算有接近30000美元，但是在當地只有40000美元的購買力，人均產值高但生活質素反而不及台灣。香港人去台灣生活就有living cost arbitrage嘅空間，攞住香港的儲蓄及收入去台灣使，就可以慳唔少。當然，去馬來西亞就更加爽啦，10000美元在當地嘅購買力有30000美元。既然馬來西亞嘅Living cost arbitrage 空間更大，點解我冇揀去馬來西亞呢？聽聞馬來西亞亦都有個居留計劃，在馬來西亞存啲錢就可以申請居留，不過每次只限10年，即是每10年就要續期一次，期間當地社會保障系統，醫療保障唔會俾我地享用，咩都要俾足錢。而且要續期嘅嘢，唔包一定得，會唔會取消？會唔會加價？冇人知。唔通到時又被迫回流香港咩。台灣對港澳居民嘅移居計劃就會接納我地成為佢地嘅一份子，全民健保住滿半年後就接納申請，定居申請設立戶籍後就可以永久居留台灣，獲得身分證及護照，可以投票選市議員，立委及總統，國民退休金計劃亦被納入其中。想長久居留無後顧之憂，當然選擇台灣啦。
其他嘅數據，包括失業率、通脹率、GDP增長率、信貸評級等等，大家都幾靚仔，冇咩好講。反而有兩個數字令我感到有啲驚訝，就是貧窮線及嬰兒夭折率。香港及南韓分別有19.9%及14.4%嘅居民生活於貧窮線下，而台灣則只有1.5%！唔通台灣真係冇窮人嘅？細心啲Google一下就好易搵倒答案嘞。香港以住戶入息中位數嘅一半釐定貧窮線，以2017年為例，1人家庭收入低於每月4000元，即屬活於貧窮線以下。台灣則以獲批準成為低收入戶的方法去計算。兩者不能直接比較。不過，睇翻 Gini Index 呢，台灣嘅數據的確是好過曬另外三個地方嘅。
嬰兒夭折率方面，在台灣每1000個初生嬰兒就有4.3個會在一歲前死亡，高於香港及南韓嘅2.7及3，實在令人不解。台灣嘅醫療制度全球數一數二，但係在照顧嬰兒方面似乎要檢討一下。
總括來講，台灣對於香港華人來講是一個不錯嘅移居目的地，進可攻，退可守。萬一我地哩個自製嘅中年人嘅 working holiday 唔成功，冇得伸延去其他地方，留在台灣居住，都可以自由安定地生活落去。
(Photo by Mihály Köles on Unsplash)