2009 我第一次去台灣旅行，用咗個幾星期踩單車由台北去宜蘭，再由花蓮踩咗去台東，算係單車環島半個圈，留下美好的回憶。咁啱得咁橋，有個成日去埋曬啲古巴呀、伊朗呀、突尼西亞呀……旅行嘅老友又去完台灣翻來。佢同我講，台灣俾咗佢一個衝擊。佢話，台灣有好多人做緊嘅一啲野，就係佢夢想中所想做嘅嘢。哈！我笑咗出來，心諗，你走勻世界咁多地方，竟然哩個不足兩小時飛機航程嘅目的地，俾倒你咁大impact？我雖然冇佢咁大反應，不過我肯定，我一定會經常去哩個地方。
2009 年正是國民黨嘅馬英九當總統剛剛執政一年的時候。2008年，國民黨通過選舉將政權從民進黨手中取回來，在台灣第二次執政。眾多評論都認為台灣是第一個實行真正民主制度的華人地區，令人羨慕。咁究竟台灣哩次選舉有咩咁巴閉呢？話說哩個地球上面，有選舉冇民主嘅國家多的是。所以如果話一個地方有民主，除咗要有選舉制度去選出政府首腦外，仲要出現政黨輪替的現象。如果每次選舉都係你贏嘅，好難唔懷疑有不公平之處，個選舉亦唔見得可以反映選民的意願。星加坡自1959年自治以來，一直都是由人民行動執政，仲未 pass 倒哩個 test，未被認為是一個民主的國家，而俄羅斯就更加唔使講啦。
近年聽到一個說法是：民主制度不重要，最緊要有快速發展嘅經濟，讓人民富起來。民主國家嘅一啲經濟政策要經過漫長的討論，平衡社會上各階層的人的意願先至可以實行，有時反而會限制經濟發展速度。極權地方話做就做，大家即刻就有工開，GDP數字當然就靚。但係整出黎嘅野大家用唔用得著呢？有冇令個社會運作好咗呢？中間徵用咗幾多土地固定財產，對環境做成幾多污染，造成幾多人患病呢？呢啲就唔會在經濟數據顯示出黎。
一個地方有民主制度，私有產權及人民的自由，法治嘅基礎得到保障，資本家、企業家先至會放心作長期投資，促進經濟增長。如果冇記錯，李嘉誠自己都講過鍾意去有民主嘅國家投資。唔信佢講都可以睇佢去咗咩地方投資：加拿大買油田，去歐洲投資流動電訊，基建業務。大家亦不妨睇吓香港啲港資上市公司去唔同地方投資之後市值嘅高低，雖然香港自被英國管治以來，從來都係冇民主嘅，但因為個宗主國係民主國家，加上香港有保障私有產權人民自由，於是整咗個經濟神話出黎。
咁點解我哩個做開殖民地順民、擅長 Hea Hea 貢嘅中年人（下稱Hea人）會關心起民主制度嘅呢？都係中國大陸政府嘅功勞。話說當年鄧小平話要收翻香港，整咗個一國兩制出黎，港人治港，高度自治，承諾將來會有民主政制，用哩樣嘢黎令人對香港前途有信心，穩定民心，減緩移民潮。嘿！咁其實鄧小平都承認民主係好嘢啦，唔係又點會用哩樣嘢來包裝穩定局面呢？唔啱不如用馬列毛主義救香港市民於歹毒嘅英殖民政府之中呀，睇下有幾多人俾你救！我當年讀小學時正是過渡期，仲學人去民政署排隊攞咗本代議政制白皮書，當然睇唔明啦，但係就開始關心起民主哩樣嘢喇。後來通過嘅基本法仲規定可以普選產生香港行政長官，實行雙普選。而我就信咗喇……之後咩事大家都知啦。
另一邊廂，台灣發展出自己嘅民主制度來，加上氣候宜人，物價穩定，有中國人的飲食習慣，因此有先知先覺嘅論者提議港人到台灣享受退休生活。搬去台灣住哩個 idea 就係咁，入咗我腦裡面，backgroud run 咗近十年，間中都會攞出來諗下。
後來呀仔出世，剛好兩星期後就放完暑假，我地發現每個月就有一兩個學生自殺，係每個月都有！我本來都覺得香港嘅教育制度好唔妥架啦，估唔到已經嚴重到令到啲細路自殺！咁其他未嚴重到要死嘅學生呢？都怕且唔會好得去邊。哩個結構性問題，博唔過，哩啲所謂嘅教育，將所有有趣嘅課外活動都變咗跑數跑Cert活動，變得無趣乏味，為咗贏在起跑線，手仔都未發育好就逼啲細路寫字，我真係唔認同。我同老婆都一致認為唔可以俾佢入讀香港嘅本地學校。但係，去國際學校咩，一來好很貴，俾唔起，二來有啲國際學校都開始俾家長話功課唔夠，遲早淪陷；home schooling 咩，一來法律唔容許，要教署批准，二來自己唔會有咁多精力。最緊要係，人好容易受環境影響嘅，身處香港要做啲同大部份人唔同嘅嘢，需要承受極大壓力，我老婆陀仔時已經有人問：搵咗幼稚園未？報定名未？8月出世是細B，好難有幼稚園收喎……對住咁嘅環境，想保持頭腦清醒都要消耗大量嘅意志力，仲邊有餘力去追求更美好的教育。所以，要離開哩個環境，期限係呀仔讀小學之前。
我哩個Hea人，搵錢唔多，但係為咗一路可以Hea落去，錢亦都唔會使好多，剩咗啲錢仲得益於2003-2008年嘅香港股市狂潮，賺咗筆小橫財。去歐美國家就唔係好夠，俾我去得到又要打工，冇得Hea。去台灣就夠有凸，可以繼續Hea Hea貢。於是乎個 background job又浮咗出黎，係時候要準備執行啦。
(Photo by Remi Yuan on Unsplash)