超級市場
屋企附近有兩間超市，分別係頂好（Wellcome）同全聯福利中心。睇英文名及外型，大定都會聯想到香港嘅惠康超級市場。冇錯！台灣嘅頂好同香港嘅惠康同屬一個集團架。而全聯呢，點解間超市叫做福利中心呢？原來佢前身係供應軍人、公務員及教職員嘅生活必需品嘅舖頭，主要目的係「改善台灣公教人員薪水微薄、生活條件不佳的問題」，有福利成份嘅。經過多年嘅發展，私營化成為今日嘅全聯福利中心。呢兩間超市應該鬥得幾激烈架，我就貪間頂好門口有個斜路，方便我推BB車出入，所以都會傾向幫趁佢地。不過，全聯有個策略做得幾好，佢地叫自己做「二廚」，幫助忙碌嘅家庭主婦備料，準備生鮮食材，買翻屋企調味後炒兩炒就有碟餸嘞，所以我老婆就會去全聯多啲。以我地嘅食量，至少買成兩三盒肉先至夠食。
講開生鮮食材，台灣對待豬肉夠曬認真，除咗清楚列明部位（其實香港應該都有嘅，不過我地冇買餸唔知姐），仲有講明咩豬種，例如深坑黑毛豬，仲有用咗咩飼料，例如花蓮酒槽豬肉。
初時為左慳錢會買啲就快到期嘅減價貨，但係可能天時暑熱，間中啲肉會變變地，所以後來都戒咗呢舖癮。
我地去開哩兩間超市地方真係夠大，大大架BB車推入去都行動自如，人口密度低，環境係舒適啲。全聯啲貨架安排，感覺上有啲似香港嘅CitySuper，整齊企理，好少中間再堆多一個促銷貨山。只要收銀有多兩三個人排隊，就會呼叫「請支援收銀」，跟住就會有人開多個 counter收錢，唔使等好耐，購物經驗愉快。
買尿片、奶樽、奶粉等，我地會去啲藥房，例如丁丁藥粧、慈航藥局呀咁。如果要買家品，屋企附近就有「小北百貨」、「琳琅滿目」之類嘅家品雜貨店。講講下，誤打誤撞，都好似搵倒個幾方便嘅地區住。
Costco 好市多
以上哩啲都係香港有嘅嘢，跟住落黎要講嘅就係香港冇、台灣有嘅大賣場，包括大潤發，家樂福（Carrefour），好市多（Costco）。哩啲大賣場，預咗你買大量貨品，都會設有免費停車場，買完嘢俾曬錢就可以推住架shopping cart去停車場，搬曬啲貨上車。我地最鍾意嘅大賣場就係好市多。好市多嘅貨品種類不多，樣樣都大大盒，尿片要一箱三袋咁買，豬肉牛肉以兩公斤起跳，入到去，見住啲大大箱嘅貨品，就好似去咗大人國咁。如果唔係屋企人多兼且成日煮飯，都幾難食得曬。好市多既然要你一次買咁多，價錢當然係平啲嘅，但係最重要都係品質好，萬一買錯咗，仲可以無條件退貨。我就試過退咗一大樽買左一年嘅香料，單都唔使俾。有次啲尿片改咗男女共用版，買黎試咗幾張，發現漏尿，一樣可以退。就算係電器，90日內退都得。買鑽石戒指去求婚，求唔成婚，又退得。得咗！
所以我地每星期都會去一次大賣場入貨，而家開始發現個雪櫃唔係好夠用嘞。
(Photo by Markus Spiske on Unsplash)