同台灣人討論地震，都會聽到三個數目字：921，就係1999年9月21日發生嘅集集大地震。由於震央就響台灣本島中央，震源深度8公里，達到芮氏地震規模 7.3（Richter magnitude scale，即係港澳地區所講嘅黎克特制地震震級），維基百科的圖片顯示，整個台灣本島，東南西北嘅主要城市都發生3至5級的地震，釋出的能量相當於44.7個廣島原子彈的威力，可謂上世紀台灣最嚴重的一次地震，造成51,712間房屋倒冧，53,768 間房屋半冧，大量道路橋樑、公共設施、電力通訊供水及去水設備受損。有2,415人罹難，29人失蹤，11,305人受傷。
印象中，咁大規模嘅地震，死傷人數都是數以萬計嘅，Google一下資料，就可以見到近年全球其他地區嘅地震傷亡數字：2010年海地7.0級地震316,000人罹難，2008年四川7.9級地震87,587人罹難，2005年巴基斯坦7.6級地震86,000人罹難，2003年伊朗東南方6.6級地震31,000人罹難。對比全球嘅數據，可見隨住歷次地震嘅經驗累積，法規嘅更新完善，台灣在防震救災的成績其實做得唔錯。經過 921大地震後，台灣新建房屋嘅防震標準又再提高，所以越新建嘅房屋，防震標準越高，防震能力越強。有意在台灣置業嘅朋友可以注意哩一點。
我深信，以當今人類嘅科技，要建築一棟防震力強嘅樓宇，絕對係冇難度。大家試諗一諗，果啲日日在海上航行，成個商場加酒店咁大嘅郵輪，幾百米長幾十萬噸嘅運油輪，日日俾海浪沖擊，在海上搖來搖去，所受嘅破壞力應該勁過地震嘞掛？但係佢地都可以安然無事。將哩啲船嘅鋼結構放在陸地上，應該點都可以頂倒啲大地震。921嘅主震歷時102秒，要撐得過呢分半鐘，唔難呀，雖然餘震不斷，但係點都冇海上面嘅浪咁頻密啦。
科技成熟仲要有效嘅管理及嚴謹嘅監察制度配合先至有用，台北市在921大地震時各觀測站均錄得5級嘅地震規模，但只有一座大廈倒冧——1984年落成嘅東星大樓，造成台北市的87人罹難。事後調查，結論係因為東星大樓嘅混凝土強度不合格、施工不當及設計疏失，導致耐震能力不足。即係建築商偷工減料啦。
雖然東星大樓嘅住戶可以向建築商索償，但係東星大樓係由一間「一案公司」所建成，成間公司就係為咗起哩棟樓而成立，起完棟樓，賣曬啲單位，抽走資金就被解散嘞，冇得追。大家如果有意在台灣置業，避開哩類發展商就比較有保障。有啲大財團亦都會有此一著，賣樓廣告就話咩咩大公司，信心保障，到簽買賣合約時就變咗另一間公司。財團下有唔同嘅子公司好正常，但係都係check請楚間子公司係唔係果啲「一案公司」，小心中伏！
好！講咗咁耐，到底台灣地震驚唔驚呢？咁就梗係你驚我都驚，話唔驚其實都驚驚地啦。地震係突發事件，吸引傳媒花大量篇幅報道，畫面越震撼，播出次數越多，唔驚都變咗驚。睇翻世上其他致命嘅事故，例如空氣污染、交通意外等嘅數字，其實遠超過地震所造成嘅死亡。根據世界衛生組織嘅最新統計，每年因為吸入戶外污染空氣引發疾病導致死亡嘅有420萬人。係「每年」喎！即係年年都死咁多人喎。其實空氣污染唔係應該得人驚過地震咩？睇翻台灣嘅人均壽命又唔算太差喎，如果台灣嘅地震真係咁得人驚，就唔應該有80歲以上嘅人均壽命啦。
地震的確係一個風險，但係又唔係大到話令台灣成為唔適合移居嘅目的地，世上實在有更多比地震更高風險嘅事。我認為只要在選擇居所或置業時多加留意，平時注意一下學習地震時嘅應變方法，就可以再將風險減低嘞。
(Photo by Charlie Deets on Unsplash)