黎台灣旅行，開翻張預付卡（pre-paid SIM card）唔少得。2009年第一次黎台灣踩單車，為咗開張 SIM card 打電話搵酒店民宿（當時流動數據未盛行)，要在台北市留多一日，等啲舖頭開咗先有得開卡。而且開 SIM Card 要實名制，仲要用兩份文件（護照、入台證），一搞就搞咗個幾鐘。好彩當時年紀小，有的是時間，換轉係而家，辛苦儲翻來嘅 Annual Leave 唔係攞黎排隊填表開卡下？！後來發現，桃園機場係有得買SIM Card 嘅。佢地做慣遊客生意，五分鐘即開卡，挽救咗好多珍貴嘅旅遊時間，價錢仲好合理，無限上網三五日，都係幾百蚊台幣。不過聽講鴨記好似有啲仲平嘅，我就冇去深究嘞，搭程車去買，啲車錢都喺返度，不如落機到步嘅時候順路買埋。
網絡覆蓋方面，我用過台灣大哥大及遠傳，兩個都幾好，玩曬成個台灣都冇咩地方收唔倒。不過當時台灣大哥大就可以俾我做埋 hotspot分享網絡，遠傳就唔俾嘞，所以後來都慣咗用台灣大哥大。有年聖誕節在台灣，我仲專登在 YouTube 開個 Snow Man 應下節，聽 Walking in the Air，流量大嘅 Video 都仲係好流暢。
不過大家要注意嘅係，流動數據雖然平，但係通話費係逐分鐘計嘅，尤其係打電話去固網（台灣人好似叫「市話」），費用係有啲貴，確實係幾多錢我就唔係咁記得，所以本地人要打電話俾人，多數用 Line 嘅語音通話。好似用固網打去固網，都係段分鐘計，不過就平啲。而我就淨係開手機，間中要打「市話」就用 Skype，唔使個個月都俾錢。
搬咗來台灣住落之後，去咗個好偏僻嘅地方玩：中橫公路上武嶺。台灣大哥大受到考驗嘞，我嘅電話開始收唔倒訊號，但係我見倒啲朋友仲可以打電話喎，一問之後發現佢地原來係用中華電信。佢地解釋話中華電信以前係國營電信公司，有責任要覆蓋整個台灣，所以中華電信嘅網絡覆蓋最全面。作為一個自由市場 L，深信私營企業嘅服務先至係最好架麻，我仲以為啲政府辦嘅公司，服務唔會好得去邊添。咩原來係咁架！
為咗深入些少了解一下，我做咗少少嘅 research。
中華電信的確係政府嘅，大股東係台灣政府嘅交通部，果然係有政府背景。市場佔有率35%，係最大嘅流動通訊公司。
台灣大哥大，市場佔有率25%，原來係富邦集團嘅一員，老闆係蔡明忠，福布斯話佢嘅財富達92億美元，係台灣首富。
遠傳，市場佔有24%，係遠東集團嘅，老闆係徐旭東，曾經同中國移動達成協議，接受溢價入股，後來過唔倒審批被台灣政府叫停，其間遠傳股價大升，溢價不存在，擱置協議。
另外有兩家市場佔有率不到10%，分別係台灣之星及亞太電信。台灣之星屬頂新國際集團系，老闆係魏應交。由於頂新集團於2014年捲入台灣劣質油品事件，台灣之星曾經被台灣人杯葛。而亞太電信原本係力霸集團旗下，後來力霸倒閉，亞太電信被政府接管，最後鴻海入股，持有接近兩成股權，成為最大股東。
好嘞，了解咗咁多，邊間電信公司好呢？
嗱！我就咁諗嘅：中華電信市場佔有率最大，網絡容量應該最大啦，相信亦都最有資源去建基站，所以網絡覆蓋最全面。但係，網絡大，客戶多，會唔會網絡擠塞呢？電訊網絡就好似大廈啲電梯，一定唔可以有咁多個 subscriber（住戶）同時間使用個網絡（電梯）架啦，因為我地冇需要無時無刻都用緊個網絡（電梯），所以一定會有啲時段個網絡會非常繁忙擠塞，要排隊等先至可以攞倒條線。我嘅假設係，個網絡越大，用戶雖然亦越多，排隊攞線越快，好似大酒樓等檯、等電梯，公廁輪廁格咁，多人入都多人走，貨如輪轉。
好！理論完畢。為咗唔想老點大家，我專登請教咗一位做咗廿幾年流動通訊網絡嘅工程師，睇下係唔係咁。
佢話：冇得咁樣一概而論架啵，好睇個 operator 自己啲客嘅 behaviour。有啲可能鍾意煲劇打機，半夜三更都仲 chur 個network，有啲就翻工時間勁用個網。所有 operator 都要基於客戶行為去預測需求，在唔同地段增加網絡 provision。香港啲地鐵好似金鐘站就冇得搞嘅，因為係地鐵自己整再租俾啲 operator，地底都冇咩地方裝機，所以好難擴充網絡容量，地面黎講就容易好多喇。收得好唔好都好睇個人習慣，好似放工行邊條路翻屋企，屋企座向都有影響架。而且 operator 都會改善網絡架嘛，所以網絡嘅表現都會變架，唔能夠單純以 Market Share 來判斷……
各位看官，你地睇咁耐究竟睇咗啲咩？我講咁多野，就咁俾佢推翻曬啦。唔好𠝹個 Mon 住，最後都有個 take-away 嘅。中華電信在偏遠地區的確係收得好啲，好似我咁，鍾意在台灣通處走嘅，埋開個中華電信囉，我張約到期時都會轉架喇。其他朋友長期留響市區嘅，三大電信商求求其搵一間囉，邊間方便，啲 sales 順眼，就俾次機會佢，唔掂嘅就帶個 number 轉台。佢地競爭得好激烈架，上次中華電信搞 499 吃到飽，其他供應商焗住要跟，自由市場可貴之處就係消費者得益喇。
(Photo by NordWood Themes on Unsplash)