台灣有咩生意做

我2009年第一次踩單車遊完台灣後，唔知響邊度見倒話香港人在台灣做五百萬台幣嘅定期存款就可以申請居留，住一年就可以申請定居添，睇落真係賣大包，心諗有朝一日都可以經哩個方法黎台灣住下。當時香港嘅推力冇咁大，又唔知道原來定居後可以保留香港嘅身份，又要放低曬香港啲嘢去住一年喎，於是就冇認真去諗嘞。

五年後，2014年，正當慢慢越來越多香港人諗緊移居去台灣嘅時候，突然間台灣政府改例，冇咗做定期存款哩條路啦！呀！呀！呀……仲傳話投資移民個投資額會加到一千萬台幣呀！呀！呀！好彩，最後開出來都冇加咁多，但係以後要申請到台灣居留加定居，就要開一間資本額六百萬台幣嘅公司，經營一年，人在台灣住一年，就可以申請永久居留。

經過哩次改變後，時不時傳出政策有改變，要提高投資額啦，要增加聘請當地人嘅要求啦，哩啲其實都係大家搞唔清台灣對香港人及澳門人有特別優惠，混淆咗佢地對其他國籍人士嘅一啲要求。事實上哩個六百萬投資嘅scheme，2014年至今都冇改過嘅。我來聽聞在1997前，英國要交出香港時，中華民國政府都有意見架。當年滿清政府於1842年簽南京條約，將香港割俾英國，家下英國要還翻出來，唔係應該還俾在辛亥革命推翻清政府嘅中華民國咩？不過，台灣當然唔夠大陸爭啦。當時，台灣政府好似俾香港人簽張紙就可以移居台灣架。收唔翻啲土地，開門俾佢啲人民入黎呀。時至今日，台灣政府對港澳居民都仲係有優待架。

講開又講，當年載卓爾夫人交翻香港出來時，都成功叫北京兌現咗啲清朝嘅債券俾英國人架，因為北京政府認為佢係中華民國嘅獨有繼承者呀麻，認咗啲資產，都要認埋啲債架。最近又有班持有清朝債劵（Hukuang Railway bond）嘅美國人要Trump Trump幫手叫北京政府兌現呀，好似成萬億美元架。呢鋪都唔知點拆囉。

好講翻正題先。雖然投資金額淨係加咗一百萬，但係要做生意喎！我淨係識做 sales，賣保險，買下美股咋喎，要我做一盤生意，好驚呀。諗咗好耐，想求求其其搵吓啲嘢黎做，做個樣過咗骨先算。不過諗諗下，哩個心態都唔係咁好。咁唔情願去做，實做到唔湯唔水，等陣俾人認為我地盤生意太流，唔算數，冇得申請定居仲衰。與其花精神去諗點樣過骨，不如發揮一下想像力，認真諗下有咩可以做，除咗用來申請定居，希望仲可以養埋一家大細啦。我地目標咁宏大，搞出黎盤生意仲唔夠曬堅？！

根據我過往觀察所得，為咗增加成功率及減低經營壓力，經營哩盤生意要符合以下幾個原則：

1. 生意及興趣要有界線

能夠將自己嘅興趣或嗜好應用在一盤生意上面係件好事，但是，每次想投資購買器材前要分清楚係盤生意需要用到還是自己想買黎玩？千祈唔好因生意之名而立亂動用珍貴嘅資金。

2. 輕資產經營

我地去到另一個地方經營生意，實在有好多地方需要慢慢摸索（其實在自己土生土長嘅地方做生意都係一樣啦），唔可以一下子投入大量資金去購買資產器材。萬一睇錯市要變陣，資金已經消耗曬，咁就弊傢伙。到時要變賣資產，又未必賣得出，價格亦唔會好得去邊。

3. 每月固定開支越低越好

做生意呢，客源係要慢慢累積嘅，營業額係冇保證嘅，如果每個月都要交高額嘅租金或著其他經常性開支，就要好辛苦去跑數，咁就捉蟲啦。

去台灣做生意，好多人都會即刻諗起開咖啡店或者開民宿。我個人覺得哩兩個選項都唔符合以上嘅準則，而且競爭激烈，建議有興趣嘅朋友去到住落一兩年認清環境後先至考慮。

一啲 franchise 嘅業務，有個template 跟下，但係專營費用又貴又唔值，供貨定價都俾專營公司決定曬，生意成功肯定俾人分一大截，想賣盤又有限制，日日就要坐響度看舖，同買份工俾自己打冇咩分別，唔係我杯茶。

提起去台灣發展，有部份人會提出當地嘅一大堆「缺點」，例如：普遍民眾英語水平唔夠好，缺乏國際視野等。其實哩啲「缺點」，正正就成為香港人嘅競爭優勢。香港人多以英語為工作上嘅語言，用英語跟西人溝通亦都非常習慣，充滿自信。而台灣嘅消費產品價廉物美安全可靠，居民待人友善治安良好，仲有好多潛能因爲語言上嘅隔閡而未能發揮出來，香港人在諗做咩生意時，可以集中發揮自己嘅競爭優勢，彌補台灣嘅不足，將台灣嘅產品及服務推介到世界各地，除咗唔使同本地人競爭佢地熟悉嘅市場，亦都可以為哩個地方嘅長遠發展出一分力。

我地讀大學申請入住宿舍時，宿舍啲大仙都會問下啲新同學可以對宿舍有咩貢獻啦。咁而家要加入人地個社會，埋諗下自己有咩可以幫手囉。

(Photo by Alexandre Godreau on Unsplash)