台北生No. 2
叉開咗咁多，終於可以講下我地個No. 2 嘞。我老婆陀No. 2嘅第一個trimester，我地仲未去台灣，在香港嘅產前檢查當然都係搵靚仔醫生同埋東區醫院啦。 OSCAR呢就費事做嘞，直接驗血睇DNA啦。No. 1經東區醫院介紹，用美國嘅Panorama，要速遞啲血去美國檢查。靚仔醫生話香港中文大學都有哩類技術叫T21，價錢差唔多，啲血又唔使寄黎寄去，結果就當然快啲有啦。到要做胎兒器官結構掃描嘅時候，咁啱我地在香港清屋，準備寄啲嘢去台北，要在香港做。問東區醫院啦，原來事隔兩年，東區醫院已經冇咗哩個服務嘞。我估應該係政府cut咗醫管局budget，醫院要減少服務，減省開支。
唔緊要啦，搵靚仔醫生做埋囉。呀！原來哩個胎兒器官結構掃描，係婦產科裡面一個更加專門嘅學問來，靚仔醫生都要refer我地去另一個醫生度。婦產科已經係專科啦，原來仲有專科中嘅專科，唔怪得上次東區醫院個醫生望住啲雪花都分得到胎兒啲器官內臟啦。驗出黎嘅結果都好彩，樣樣都 OK，還得神落。連我老婆第一胎嘅妊娠糖尿都冇出現過。第一胎是高齡產婦，第二胎就肯定更高齡啦，點解今次冇事呢？佢自己就認為第二第三個trimester在台灣成日要買餸煮飯，又行又企，活動量大增消耗唔少血糖。相比佢陀第一胎時日日坐響 office，活動量真係高好多。
香港有靚仔醫生幫我地接生，咁台北有邊個醫生呢？勁呀！我地搵倒個一樣咁靚仔嘅醫生開刀接生，成個劉德華咁架，呵呵呵。
我地一到台北就搵朋友介紹啲醫生啦。哩位劉華醫生原本在一間大婦幼診所嘅，出咗名開刀，後來佢自己同幾個醫生出來開檔。香港啲醫生會在醫院掛牌，租手術室做手術，patient住醫院病房，醫生在自己診所睇完症就去醫院巡房。台北就唔係咁樣個喎，原來一間婦幼診所係可以做埋手術接生嘅。配埋病房、廚房等等，成個分娩恢復過程都可以照顧得到，唔使去醫院。劉華醫生平時就在2樓睇症，要接生開刀時上樓洗手換衫就可以入手術室嘞。
間診所佔咗4層樓，規模都唔細，但是，萬一有咩事複雜嘢，搞唔搞得掂架？初時都有啲擔心，不過諗落，人地生仔都有在屋企生，再加上產前檢查做足嘅話，應該都冇咩特別嘅風險嘅。
講開產前檢查，劉華醫生嘅診室唔細，同香港靚仔醫生間豪華診室有得比，大家都有大銀幕顯示超聲波影像，每次診金都千幾元，一個係港幣，一個係台幣。
聽講香港有啲醫生照超聲波診金六百幾，不過每次都要等好耐，影響孕婦休息，我就情願唔照嘞。
好嘞，跟住好快又要生嘞。劉華醫生要響肚皮同一個位開刀，check一check 後，佢話之前條痕收得唔係咁靚，到時候可以執一執佢。我地心諗，咁勁？然後佢都預左我地要幫No. 2擇時辰八字出世，約時間開刀。佢話個時間有啲忙，不過還可以（果然係好時辰）。佢話試過一次過開三台，都唔會誤時。
病房有兩種，一種係單人房，另一種係大啲嘅單人房。不過冇得揀，到時睇下邊間房得就住邊間。可以揀包伙食，一日六餐，餐單由營養師設計，仲有啲食療功效，唔使辛苦外母煮嘞。台灣啲病房好興要有個親人陪住，幫手照顧病人，所以大房會多張床，細房就有張硬梳發。
香港開刀用半身麻醉，我老婆會知道整個過程，仲可以第一時間見到No.1。台灣哩度就用全麻，訓咗發生咩事都唔知。生完B後剛好夜晚，醒來時會好口喝，要俾水老婆飲。屋企個No.1夜晚唔可以突然間冇曬父母，我就只能在屋企陪佢嘞，所以都係要外母飛過來幫手。記得在香港生No.1時，在醫院咁啱有對夫婦生完第二名，個第一名同爸爸探完媽媽之後扭計要媽媽翻屋企。爸爸當然要強行帶走佢啦，於是在醫院外面喊到拆天，俾警察懷疑是拐帶兒童，個爸爸要帶埋個警察翻上去醫院搵人證明先至可以洗脫嫌疑。所以呢，No. 2嘅出世，對No. 1嘅衝擊好大架。屋企有兩個，其實花唔止兩倍精力，No. 1會更加黐身，更多要求，話2.5倍都不為過。
(Photo by Ibrahim Boran on Unsplash)