好嘞，搞掂曬啲日常生活嘢，可以開始安胎迎接我地嘅No. 2嘞。係呀，我地要在台灣生多一個呀。哩個真係命運嘅安排黎嘅，當我地kick start咗移民哩個process後，唔小心咁整多咗個出黎。我地哩個No. 2就響我地人生最大變動時期，準備出世嘞，而且，仲要係在台灣未攞到健保卡之前出世添，咩洗費都要全自費。不過咁都好，可以比較一下兩地嘅醫療費用，服務質素。No. 1同No. 2剛好相差兩歲，都係用私家醫院服務，有得對照比較，應該夠曬參考價值啦。
香港生No. 1嘅經歷
2015年1月，我同老婆去完台灣北海岸踩單車。翻到香港後，佢話有啲唔舒服，好似作感冒咁，於是乎去咗睇相熟嘅中醫師。中醫師把完脈，問兩三個問題後就陰陰嘴笑住咁話可能係喜脈呀。我老婆二話不說，即刻去搵佢當年嘅大恩醫確認，順便搵佢接生。
點解係大恩醫呢？話說當年我老婆生子宮肌瘤，個個醫生都話要開肚，有個醫生仲話有可能要成個子宮切咗佢喎。好彩有朋友介紹哩個大恩醫，微創手術高手，響我老婆個肚開三個細窿仔，將佢個大瘤切咗，保住咗個子宮，住一晚醫院就翻得屋企嘞。三日後就行得走得，仲可以用剩餘嘅病假去行街睇戲。可惜佢唔再做接生嘞，介紹咗一個靚仔醫生俾我地。
靚仔醫生亦都唔錯架，診所夠大，約咗幾點就幾點有得睇，唔使有好多人排住隊咁等好耐。診室內有個大螢幕顯示超聲波影像，一齊睇下肚裡個BB生成點。佢亦都好明白我地嘅心態，一啲公立醫院有嘅免費檢查，就叫我地去公立醫院做。
我地住東區就當然去東區醫院做產前檢查同埋聽seminar學習照顧初生嬰兒啦。
唐氏綜合症嘅screening（OSCAR）
陀咗個BB一段時間後，第一關就係做唐氏綜合症嘅OSCAR普查。得出嘅數據竟然有1/50嘅機會個胎兒有唐氏綜合症，要再進一步檢查。我地揀咗Panorama抽血驗DNA，睇下胎兒有沒有唐氏綜合症之餘，順便驗埋其他遺傳病。印象中要等成個幾星期先至有結果。如果有事就收電話，冇事就收信。嘩，哩個幾星期就真係過得辛苦囉！患得患失咁，要抑壓住興奮嘅心情，萬一有事……喔！唔係萬一呀！係50分之1嘅機會有事架。到時會好失望架嘛。我地費事啲老人家擔心失望，一直都唔俾佢地知道有BB哩個喜訊住。家陣個肚越來越大，個 Panaroma結果又未到，都唔知可以瞞多幾耐。後來收信結果都係冇事，咁就過咗一關，可以同屋企啲老人家公佈喜訊嘞。
糖尿病測試OGTT
我老婆屬高齡產婦，要小心一啲，所以醫生在妊娠初期就要佢做OGTT，空肚時5分鐘內飲完一大杯糖水，分兩次抽血驗血糖，睇吓身體自己可唔可以控制倒血糖於正常水平內。結果： Failed。要見營養師，嚴格控制飲食，買血糖機，定時定候拮手指驗血糖。如果唔咁做，對胎兒有好多不良影響，嚴重者會導致胎死腹中。
要嚴格控制飲食就真係凄涼，佢食完早餐後11點有條香蕉食下，到10點鐘已經開始想像緊條香蕉有幾咁美味，幾咁香甜。
胎兒器官結構掃描
去到妊娠第二十週，就要做一個高解像胎兒器官結構掃描，檢查吓個BB啲器官生長如何。我地如期去到東區醫院某個 ward。等咗一陣就有個專科醫生黎幫我老婆照超聲波。佢對住螢光幕啲黑影，用隻mouse click吓click吓，同我地講哩個係胃，嗰個係腎呀咁，對於我黎講就全部都係雪花。跟住度一度個黑影，話呀仔有個腎盂大咗少少，要小心啲。佢出咗世後都有跟進架，而家就唔講住，總之托賴大致上都冇咩野。
分娩
要生嘞！靚仔醫生幫我地book咗聖保祿醫院，夠曬近屋企，好彩當時香港再冇雙非嬰兒嘅問題，我同老婆仲可以幫呀仔揀個靚靚地嘅時辰八字添。呀係！唔記得講我地選擇開刀攞個 BB 出來添。話曬我老婆都係高齡產婦，之前又做過吓手術，開刀穩陣啲。最緊要係萬一自然分娩唔成功，要緊急開刀時就會超貴架嘞，不如揀個時間攞佢出來好過。但係大家唔好玩野，走去揀半夜開刀喎，要勁加錢架，因為成條team要半夜開工，淨係補水都有排計啦。
香港地啲病房使用率真係高，我地用聖保祿醫院嘅生仔package，生仔當日報到後仲未有床位用架，要在Reception附近嘅產房換衫後等上手術室，生完後先至有個床位安排俾我老婆。等咗一陣就快夠鐘嘞，換衫推入手術室。醫生入去冇幾耐，呀仔就推出來嘞。不過，老婆就仲係入面，真係有啲擔心呀。過咗一陣，老婆終於都出來啦。原來醫生係要觀察一下個子宮，確保冇咩問題先至縫翻個傷口。聽老婆講啲麻醉藥好神奇架，淨係會令人冇咗痛覺，其他感覺會仲響度架，俾人㩒整㩒下個肚都感覺倒，聽落都驚驚地。
聖保祿醫院嘅護士知道我地想exclusive breast feeding都好配合，等呀仔情況穩定後就搵位有經驗嘅護士抱佢出來吸第一次奶，順便教下我地rooting、latch on之類。之後就要個媽媽自己行入去BB房餵奶啦。係好辛苦架！不過，breast feeding嘅好處真係多到數唔曬，我老婆就話痛都值得啦。
就係咁，我地就響香港生左個仔嘞。之後就去自己區嘅母嬰健康院繼續跟進，moniter BB嘅發展及打預防針。坐月時，有人會請個陪月幫手，我地就有嫲嫲婆婆陣容強大，自己搞掂。
(Photo by Kelly Sikkema on Unsplash)