匯款到台灣

經常有人問，匯錢到台灣邊間銀行最抵，或者點樣匯最抵。哩方面我有研究，俾些少時間睇一睇你可能會慳唔少錢，到時記得請我食飯。

大家要投資移民台灣，都要匯600萬台幣到台灣。我就用哩筆數做例子，計算俾大家睇下。作為香港人，自然就會諗匯大約150萬港幣過去，然後由銀行會根據當時嘅匯率匯兌成台幣啦。

在11月嘅某一日，台灣嘅中國信託銀行（佢最大間，就搵佢做例子）會以3.854嘅匯率用台幣同你買港幣，即是你要匯出嘅港元係：

600萬 / 3.854 = 155.6824萬

但係哩個並唔係最好嘅方法，要匯美元，因為會抵啲。我計俾你睇。

同一刻，中國信託銀行會以30.3650嘅匯率，用台幣來同你買美元，所以你要匯出嘅美元係：

600萬 / 30.365 = 19.7595916萬

大部份人手上都應該冇咁多美元，就要在香港用港元買美元。香港嘅恒生銀行（佢唔係最貴又唔係最平，所以搵佢做例子）嘅匯率係7.848 ，計出要用港元嘅額係：

19.7595916萬 x 7.848 = 155.073275萬元。

兩個方法，最終都會在台灣收到600萬台幣，但係，喺香港唱咗美元先，反而會用少咗港幣：

155.6824萬 – 155.073275萬 = 0.6091萬 = 6091元

嗱！慳咗成港元6091架，係唔係要請食飯先！

所以大家唔好放錯重點，去睇果一兩百嘅匯錢手續費。最緊要睇銀行的外匯牌價。如果想再平啲，可以睇下邊間銀行啲美元平啲，好似永享永隆哩啲細銀行，個價會再靚啲（7.842），獅子銀行開個價就比較貴（7.8707），不過佢話啲特選客戶會俾個靚啲嘅價喎，你鍾意就問下佢啦。而我呢，就係去證券行 Interactive Brokers 買美元，最抵。我推算在 Interactive Brokers 應該最多慳咗9000元，哩個係極限黎。你可以自己決定值唔值得為咗再慳多3000元而去專登開個戶口。

上面仲有一個費用冇寫出來嘅，就係銀行嘅電匯費，大約港幣200元。不過，匯美元或港元都要俾嘅，慳唔倒，就唔計勒。

有唔熟外匯交易嘅朋友可能會話我哩啲叫炒賣外匯。師兄⋯⋯哩啲並唔係炒賣外匯，炒賣外匯嘅人係買左之後等佢升或跌，而我上面 quote 出來嘅匯價，係同一日同一個時間抄低嘅，冇外匯價格波動成份在內。哩個價差係無時無刻都存在嘅，唔信你即刻上網開曬啲匯率報表出來自己計一次。

出現呢6000元嘅價差，係因為貨幣在唔同嘅地方地位有所不同，台灣嘅銀行對港幣開個價低啲，對美元開個價高啲，好明顯係因為港元在台灣地位低啲。美元在全球嘅外匯買及賣佔 88%，港元則佔3.5%，台幣佔0.9%（2019年4月數據）。

根據中華民國中央銀行嘅數據顯示，2019年8月統計，在台灣嘅台幣外匯交易，有44.2%係同美元交易。同其他貨幣交易只佔1.6%，另外果54.2%就是其他貨幣之間嘅交易。而港幣就要響果1.6%再細分嘞，真係少到得個零頭咁囉。台灣嘅銀行同你收收埋埋嘅港元多極有限，之後又要同翻香港嘅銀行匯兌，量低成本高，開俾你個價埋低囉，所以你就要用多啲港元買600萬台幣囉。

相反，美元佔全球外匯交易88%，只有12%唔係同美元交易嘅，無論響香港或台灣，都有大量嘅交易額，外匯牌價自然靚啲，買賣差價低，交易成本低，所以換咗美元先至再去第二度換當地貨幣就會抵玩啲。啲錢匯到台灣後，買賣台幣都有一啲法規要遵守。咩情請睇哩篇台幣買賣的管理措施。

點解美元會成為全球第一大貨幣？有興趣嘅朋友可以自己搵啲布列頓森林協議 （Bretton Woods）嘅資料黎睇下。

(Photo by Colin Watts on Unsplash)