上回講完添置咗啲家私電器神枱，一家安頓落黎後，又同大家講下日常生活煮飯買餸。
原本響香港，老婆要翻工，我就撈住份自由啲嘅保險經紀工，主力湊仔，而我呀媽，即係BB嫲嫲就負責煮晚飯，最拿手蒸魚。不過，如果我地連續在家食多幾餐飯，佢就會開始頭痕唔知煮咩其他餸架嘞。每日起身就煩煮咩餸，真係慘呀。夾咗佢黎台灣住，就當然唔好要佢再煩哩樣嘢，等佢專心湊孫啦。而且佢唔熟地頭，又唔熟當地食材，真係唔會識得煮。所以，煮飯哩個責任就由我從來都未煮過飯嘅老婆，憑住「為母則強」哩股鬥志，承擔起來嘞。為咗減少個仔食外食，保障佢嘅食物安全營養均衡，佢梗係覺得責無旁貸嘞。
一個從來都未煮過飯嘅人點樣在一個新地方學煮餸呢？呵呵呵，我同老婆都有樣特殊技能：就是通過閱讀理解書籍去學習新技能。佢一開始買咗一大堆台灣嘅食譜書，慢慢慢慢咁煮啲飯餸出黎嘞，真係厲害呀！其間當然也有失敗嘅時候啦，有時候真係等到個肚咕咕聲都未有得食。有次話炒埋碟嘢至出黎一齊食，點知廚房傳來一陣陣聲響後突然靜咗。跟住佢好冷靜咁行出來坐低一齊食飯，話最後一碟餸已經唔存在嘞，原來係心急得濟，炒窿曬啲洋蔥。
扯得太遠嘞，講翻台灣啲買餸嘅嘢先。
街市（傳統菜市場）
我地住間屋附近就有一個大街市，行十分鐘就到，逢星期一休市，早上開檔，午後即散水，成條街咁多個攤檔即刻冇曬人，所以要留意街市嘅運作時間。街市裡面有各種各樣新奇食材熟食，選擇多，非常熱鬧。部份檔位會有唔同嘅小販租用，循環售賣唔同貨物，有啲隔日擺檔，有啲一星期擺兩次檔，所以啲小販會有卡片派，方便客戶聯絡訂貨，查詢營業時間。我地買開有間固定嘅土雞（黑色腳嘅大肥雞）檔，怕你天氣熱唔出黎，仲可以送貨到戶，唔使加錢。啲土雞咁大隻，好多時都可以斬件賣，仲可以幫你起肉去骨。台灣唔興煲老火湯，我地成日買啲起咗肉嘅雞殼翻屋企煲湯，認真抵。
街市小販一般都好友善，我老婆帶埋呀仔去行街市買啲熟食時，有時檔主見佢細路仔咁得意，會切大舊肉送俾佢揸住食。問佢地啲食材點煮，都會好詳細介紹，我地聽唔聽得明就另一回事。不過，有時問點煮好食，會話蒸、炒、煮、炸、燉都好食；問可以放幾耐，就話「冷凍」後就可以放好耐⋯⋯嘿嘿！
但係都有部份街市小販貪小便宜，見你個樣冇經驗，就會呃下你。記得初初到步兩三個月時，想食台灣有名的高麗菜，有個檔主攞住個高麗菜報價35元，我地話好時，佢就施施然走去磅一磅。分明係刻意誤導我地，35元一個變35一斤。當時台灣高麗菜豐收，價格暴跌，俾佢坤倒我地，肯定沾沾自喜。
從此以後我地到街市檔買食材，一定要有標價嘅檔口先至買。每個街市檔裡面，最少都有一個電子磅，每次可以輸入每斤嘅價錢，磅重時記得睇實就冇咁易俾人呃嘞。
講開菜價，我地響台灣住咗兩年，都經歷咗高麗菜、絲瓜、香蕉大跌價嘅時候，產量大豐收，品質一流，價格低迷，哩個時候就可以大手買入食到飽。一來好享受，一來可以通過自己消費幫助農民。
大街市熱鬧擠迫，好多人喜歡騎住架機車，一路買一路開，污染空氣，所以我地後來都比較少去街市囉。
住咗一年，發現屋企對面馬路十字路口又有一個細街市，檔口營業時間好飄忽，有時諗到自己想煮咩，過去望兩望，都會買倒啲抵食嘅食材。買開有個固定海鮮檔，細細間，原來好多嘢都有，只不過係冇放出來，開口問就有，仲幾好食添。跟住又同佢買熟咗嘞。
(Photo by Lou Liebau on Unsplash)