在台灣便利店買完野，通常收銀會問你：「要印統編嗎？」作為遊客通常都會唔知咩黎，都會呆一呆。收銀嘅反應就會係：既然你唔知就肯定唔使啦。
咁到底統編係咩黎呢？
台灣有徵收增值稅（VAT），一間公司無論賺錢或蝕錢，扣除開支後嘅營業額，就要支付5%嘅營業稅。如果你間公司營業所需，要買啲嘢，一般店舖就可以將你公司嘅統一編號印在發票上，到會計師報稅時可以扣除哩一筆開支，公司就可以交少啲稅嘞。不過，一間公司嘅開支又唔係樣樣都可以攞黎扣稅喎，聽會計師講係有詳細嘅規定嘅，通常每個項目都可佔公司營業額嘅某個百分比。至於具體係點呢，問多兩問，會計師就會建議你係唔係都印咗統編先算，等佢幫你度掂佢。但係呢，如果有啲細數目嘅交易，其實唔印統編仲好。點解呢？一陣話你知，正野黎架。
有啲時候，當你喺便利店俾錢時，收銀又會問：「要印發票嗎？」Cynical嘅我就會諗，嘿嘿，你地太蠱惑啦，想唔印發票交少啲稅？以前拿住張發票唔知有咩用，通常我都會叫佢唔使印算嘞。呵呵呵，其實台灣係有一套有趣嘅制度去防止店舖少印發票嘅。如果發票上面冇印買家統一編號，就會印住一個隨機碼，每兩個月就會進行一次抽獎，只要抽中張發票嘅部分隨機碼，就可以去郵局或者便利店對獎攞錢，銀碼由二百元至一千萬不等，視乎中左幾多位號碼。所以每一張發票其實亦都係一張抽獎券，我老婆而家就好踴躍每兩個月去對一次獎。所以如果幫自己公司買嘢，銀碼超細果啲，就無謂印統一編號嘞，攞黎抽獎好過啦。
有時候，稅局仲會有人放蛇，捉啲借啲二唔印發票嘅舖頭。話說有次想去間麵店食個午飯，間麵店竟然冇開，原來係俾人捉倒冇開發票，俾稅局罰暫停營業幾日。如果對獎時發現張發票在稅局冇記錄，就證明店舖印假發票，懲罰就當然更勁啦。
咁點解有啲便利店咁明目張膽問客人印唔印發票呢？呵呵呵，細心留意一下，其實佢地淨係會喺我地用悠遊卡俾錢嘅時候問印唔印嘅姐，當你話唔印嘅時候，張發票係會儲響張卡入面嘅，佢地係唔知你想唔想攞張實體發票姐，唔係想逃稅。悠遊卡就係其中一種發票電子載具嘞。發票印咗出來，搞到成袋都係紙，每兩個月對獎時又要逐張對，好麻煩。等陣對漏咗，錯失咗發達機會就無謂啦。發票電子載具除咗幫我地儲發票，仲可以幫手對獎，去稅局登記後仲可以將啲獎金自動轉帳入中獎者個戶口添，咁樣就可以好安心咁等待中獎，每次消費真係隨時都會發達呀！
黎台灣旅行嘅朋友，即使無諗住對獎，都千祈唔好浪費哩啲抽奬券喎，大家可以將發票捐俾啲慈善團體嘅。商場門口、路邊、電梯大堂等等，時不時會見到啲透明膠箱，果啲就係發票捐贈箱，將啲發票放入去就得嘞。到時到候就會有人收翻去，逐張發票睇下有冇中獎囉。台灣嘅志願工作發展得好好架，有好多人幫哩啲慈善機構對獎架。
我地自己通常每期都有中一兩張二百蚊架，最多仲試過中幾千。睇翻民國106年年尾嘅數據，中一千萬及二百萬嘅，閒閒地都有十幾張，有啲中一千萬嘅發票，消費金額都係幾十蚊架咋，係唔係情願唔印統編俾會計師報稅先？
我地要求商舖印發票，然後對獎呢個行為其實係幫緊稅局監察商戶交稅。稅局將監察商戶嘅部份工作通過支付獎金外判俾普羅市民執行，抵唔抵玩呢？
睇翻民國106年嘅數據，營業稅收入有3千百億，每年有六期，就當每期都有15人分別中一千萬及二百萬嘅獎金，其他零頭唔計，全年獎金支出 12Mx15x6=1080M=1.08B，佔全年收營業稅入 1.08B/380B=0.28%
嘩！用0.28%嘅收入分俾大家黎監察營業稅認真抵元！諗倒呢條橋嘅人真係夠曬聰明！
大家睇完我呢編文唔好太過熱心去監察商戶印發票喎，據我所知，台灣係有一啲免印發票嘅店舖，通常係啲小食店，舖頭會掛出「免用統一發票」嘅黃色標誌，另外的士，火車，診所，醫院都係唔使開發票嘅，要出公數就問佢地攞「收據」啦，分得好清架。
(Photo by Alain Pham on Unsplash)