以下係我地搵屋睇樓總結出來嘅些少經驗。
台灣地址有市，區，路，巷，弄，之一/之二，如果人地報出來嘅地址有哩啲資料，一定要入曬去Google Maps先至好開始導航，唔好諗住去到附近先至再睇，因為入少咗一啲就會去咗頗遠嘅地方架啦。
同一個地區，隨住屋況差別，租金出入都幾大，豐儉由人。
台灣啲樓嘅size用「坪」作單位計算，1坪相當於3.3058平方米，35.714平方尺。不過亦會有類似香港嘅建築面積及實用面積嘅問題（公設，權狀，總面積，車位），一切以眼見為準。
多數屋會含家私電器，遇到啱用嘅就最好，間屋啱用家私唔啱用嘅話，唔好諗住租咗至算。台灣人一般比較愛惜物資，唔會輕易棄置，租咗之後想掉嘢，屋主未必應承。而且棄置大件家私嘅程序亦都比較複雜，請人回收又要收費。有啲屋主甚至會將啲壞電器放在屋內唔理，你亦都冇權棄置佢啲野，所以一定要傾掂數先至好簽約。
我地在台灣居留滿一年後就可以提出定居申請，必須要有一間屋用黎設置戶籍，租屋時必定要同屋主講明有哩個需要，因為到時候係要佢簽同意書及文件俾你去申請定居嘅。有興趣知多啲，可以睇下哩篇文章。另外，如果盤生意係無店面嘅，遇到有啲屋可以做埋公司登記地址，就可以將公司地址放在自己間屋度，唔使另外出去租地方。
要留意租金包唔包管理費、停車位，有啲會包，有啲唔包，比較價錢時要睇清楚。
有啲屋主會自己放盤，自己接電話，有啲則會搵地產經紀（房仲）跟。至於房仲嘅收費，兩邊夾埋唔超過一個半月租金，一般係房東俾一個月租金，租客俾半個月租金，以後續租如果需要房仲服務，各付月租嘅10%。咁啱我地睇中果間屋嘅房仲服務唔錯，我地睇完又睇、三番四次，佢都好爽快咁答應我地，攞住條拉尺度曬成間屋都冇意見。再加上諗到將來同屋主溝通，唔知道當地人有咩講得有咩唔講得，有一個中間人隔住，冇咁易產生磨擦，所以我地覺得哩啲服務費都係抵俾嘅。
(Photo by Grant Lemons on Unsplash)