好多朋友都會問我地在台灣有沒有置業。置業是人生大事之一，需要慎重考慮。台灣比香港大咁多，未住落生活一兩年，好難肯定邊一區適合自己嘅，況且同一地區都有唔同類別嘅樓，真係冇咩必要咁快買定間樓。
加上我地有個遠大的理想，就係利用哩個自製嘅中年人嘅Working Holiday，在台灣累積經營企業嘅經驗，然後將哩個Working Holiday計劃伸展到唔同地方，在唔同嘅國家經商，換取當地嘅居留權，去下哩度住幾年，去下果度住幾年，深度體會唔同地方嘅生活，真係諗起都爽呀。所以，我地就更加唔會買樓嘞。
香港嘅樓市升到咁癲，我個人認為係一個特殊例子，唔可以將香港嘅經驗直接套落世界嘅唔同地區，千祈唔好諗住去台灣炒樓。外國人及大陸人到台灣買樓會受到嚴格管制，要去唔同政府部門申請，批准咗先至買得，如果大陸人買，仲要每半年check下有冇改變用途，邊有得好似香港咁，俾多啲印花稅就得。香港啲樓原本只係六百萬人嘅市場，突然間多咗十幾億人想買喎，個價梗係癲啦。台灣啲樓黎黎去去都係二千幾萬人去買，個價又點會炒得起。所以，不如諗下點樣實踐自己個理想或者好好享受生活啦。所以我地一直都冇去諗買樓，淨係諗租樓住。
由於我地善用「挾天子以令諸侯」嘅策略，利用嫲嫲唔可以離開個寶貝孫哩個死穴，挾咗佢過來台灣一齊住，為咗令佢容易啲適應，我地都係揀啲有lift有管理員，睇落是是正正，唔使自己等垃圾車嘅屋苑，務求盡量唔好同香港住開嘅環境有太大差別。
我地當初帶住一家大細在台北租咗Airbnb，諗住用一個月時間慢慢搵屋，點知中咗伏，間Airbnb好有問題，搞到屋企老幼好住得好唔舒服，所以我地好心急想搵倒間屋。因為有當地朋友推薦，我地就鎖定咗內湖區，上591.com.tw一搵，好快就搵倒幾間屋睇。睇咗第一間後即刻放下心頭大石，原來傳說中台灣嘅屋又平靚環境又好，係真嘅（中完間 Airbnb嘅伏，係擔心啲嘅）。我地睇咗三間屋，第一間ok，不過略為細，第二間夠大，不過舊左啲，要花時間𢴇，第三間雖然過咗budget，但係其他各方面都好唔錯，都算啦，急急地就要咗佢啦。
(Photo by Marten Bjork on Unsplash)