我地在台北搵租咗間屋後，跟住落黎就係買家私電器嘞。因為香港家居供電係220V，台灣則係110V，除左啲手提電腦、電話之類可以兼容兩地電壓外，我地唔使煩帶咩電器過去，買過曬啲新架啦，Yeah! （流汗！又要使錢）
台灣用110V都有個意外驚喜喎，想用啲靚啲嘅電器，可以直接買日本進口電器，入去電器舖，例如全國電子、燦坤，只要係日本進口嘅，都會大大隻字標明。我臨搬黎台北前先至壞咗個Panasonic三合一水蒸微波烤箱焗爐，用咗兩三年咋！無計，大陸製造，自此對哩個牌子有啲失望。聽聞香港有班識貨之人，鍾意去日本買電器翻香港用，搞到要響屋企裝個牛龜咁大嘅降壓器，而家開始理解嘞。
入到間屋，當務之急就係買雪櫃，因為我地呀仔每晚都要飲凍奶。在香港時，幫趁開Wikipedia Wong買啲唔使雪藏嘅德國UHT牛奶，台灣就通街都係鮮牛奶，大大枝一兩公升咁，好抵飲。我懷疑過都係UHT奶，但係細心研究後，發現真係鮮奶黎，係台灣奶農進口啲乳牛整出黎嘅，聽聞因爲台灣氣候比較暖，產乳量好似仲減半添。後來發現UHT牛奶在台灣叫做「久保奶」。鮮奶就通通都要雪嘅，未買倒雪櫃前唯有沖奶粉，或者俾啲獨立包裝250ml嘅久保奶佢飲。
好彩好快就響全國電子搵倒個啱使嘅雪櫃，仲掃咗部洗衣機，電熱水壺……講開洗衣機，原來台灣啲家電最貴嘅係歐洲貨，要去百貨公司或者大商場先會見到。啲歐洲式大眼雞洗衣機貴到無倫，仲要加個升電壓器先至用倒，selling point係呵護衣物。歐洲式洗衣機對於我黎講係慳水之麻，聽講台灣水費平，水資源應該好豐富，而我地啲衫就一啲都唔貴，唔使咁呵護嘞，都係入鄉隨俗，用翻啲日本式洗衣機啦。
跟住落黎就係我同老婆誓神劈願黎到台灣一定要買嘅家電：洗碗碟機機機機機……老婆聽聞Asko唔錯，不過貴過Bosch一大截，所以最終都係揀咗 Bosch。我地好慶幸當初左諗右諗，最終都係忍痛買咗部大機，而家食完飯，大大隻油淋淋嘅鑊放入去就得嘞。再加上我老婆幾廿歲人先開始學煮飯，炒一碟餸要用三隻碟，打蛋要用一條條彎彎地果啲打蛋器，點洗呀？冇部洗碗碟機真係唔掂呀。我每次食完飯都要感謝部洗碗碟機每日俾翻兩小時我呀，係飯氣攻心嘅兩小時呀。
差啲唔記得提一提大家，台灣啲百貨店大商場好興在母親節搞promotion，唔記得啲折扣有幾多啦，不過我記得我地係用咗細機嘅價錢買咗部大機嘅，如果你等得嘅就最好等到有promotion至買啦。
(Photo by Alexandre Godreau on Unsplash)