講完電器講家私。
買家私就default去IKEA啦，在香港都幫趁開，知道有咩岩用，我地呀仔用開張IKEA嘅BB櫈、沖涼膠盆，copy *.* 咁買一套，又平又安全，完全冇適應嘅問題。IKEA點解安全？因為佢遍佈全球各地，佢啲設計生產質量要符合曬咁多地方嘅安全標準喎，梗係安全啦。
床就去咗Nitori宜得利買咗張單人床連床褥俾嫲嫲用，佢都好滿意。至於我地間睡房呢，因為諗住地方大就任性，想買張超級大床瞓曬兩大兩細。可能哩種諗法鑊氣太重，冇咩家私舖有咁大張床賣，千揀萬揀，在網上搵倒喎，訂咗翻黎就知中曬伏！張床用料太少，木材太軟，我地瞓響張床上面，每郁一下，都會有吱吱聲，好難得先至氹倒啲BB瞓著覺，想逃離現場，就會有啲吱吱聲嘈翻醒啲BB。後來發現啲床板有啲布包住，先知道原來係用黎滅聲嘅。
哩個故事教訓我地：
1. 唔好響自己唔熟悉嘅地方做啲太特別嘅事；
2. 未親眼見過實物前，唔好在網上訂家私。人地家私送到黎，萬一唔啱，咁大件你想退貨都難。
之前講過，在台灣要棄置大件垃圾手續比較麻煩，所以買家私時要記得問埋幫手回收舊家私。
搞掂啲家私後，跟住落黎就係嫲嫲最重視嘅神枱（神明桌）嘞。嫲嫲在香港供奉嘅神位分兩層，上層放觀音，下層就放祖先。不過台灣啲神枱呢，大多只有一層，一邊放觀音，一邊放祖先。初時覺得怪怪地唔係好接受，後來去咗龍山寺隔離嘅佛具街行咗幾間舖，睇睇下，覺得呢個擺法都唔差，仲有一間佛具店將啲神枱擺到有一種禪嘅感覺，加埋一啲植物嘅裝飾，莊重得黎又有寧靜感。難得老人家同後生嘅都好接受，睇啱張簡約嘅神枱就落訂嘞。台灣民間宗教信仰發達，重孝道，慎終追遠，哩類產品都造到十分精緻。銅製嘅香爐嘅銅料要入口嘅，拎上手好似啞鈴咁重，燈又係用啲實心金屬，打磨到無縫無痕。祖先牌位用玻璃盒裝住，裡面再夾住一片木片，用電腦刻上先人名字、生卒日期，十分認真講究。有咗哩張神枱，嫲嫲每日奉神換水，有咗精神寄托，開始安頓落黎嘞。
(Photo by Match Sùmàyà on Unsplash)