講開搬去台灣生活，有一個常見嘅憂慮就係地震。我有一次買咗機票準備去宜蘭玩，出發前收到宜蘭地震嘅消息。上去台灣氣象局網站一睇，嘩！每日都有地震嘅數據？！唔係掛！2至4級嘅日日都有，不過就冇咩事，通常都冇感覺。要震央淺啲嘅，大啲嘅先會係有感地震。所以當年我都如期出發，玩完翻來都唔記得有地震哩回事。
搬到去台灣住落來嘞，有日正是風和日麗，一家人坐緊捷運出街，無啦啦收到來自對岸嘅親友發短信黎問候我地：台灣地震呀，你們有沒有事？經過上次去宜蘭的經驗後，我冷靜咁上網查一查，發現震央響遙遠嘅海底，所以整個台灣島上嘅人都無乜感覺。心懷感激地安撫一下親人，解釋一下，叫佢唔使擔心。
響台灣嘅第一個農曆新年，終於可以感受一下咩叫有感地震。夜嘛嘛突然間成屋啲手機「啲啲啲……」咁響，好似防空警報咁，跟住好快就感覺倒搖晃咗兩下。原來係花蓮地震，中央氣象局一探測到震得算幾大就發出警報。勁呀，警報快過啲地震波呀！跟住果晚就每隔一陣搖兩下。有台灣朋友知道咗台北市有有感地震，紛紛向我地解釋一下有咩要注意，跟住我地就安心地去訓覺嘞。呵呵，其實最嚇親人嘅係啲警報聲。
台灣人鍾意叫地震做「地牛翻身」，話係地底住咗隻牛，佢郁一郁就引致地震嘞。有講法話，頻密嘅小地震可以將儲存響地底嘅能量釋放出來，避免地底嘅張力儲儲埋埋一次過爆出來，形成強烈地震。如果係真嘅，雖然間中震兩下有啲煩煩地，不過咁樣震法總好過來一次勁嘅。
之後過多兩晚，手機又響警報啦。今次震法有啲唔同，係由細變大，上下咁震，時間稍稍長一啲，有幾秒吧，都有兩級以上。正當考慮緊係唔係要抱住啲BB，離開屋企去戶外地方避一避時，附近嘅農曆新年打麻雀聲又響起嘞——即是話唔使驚啦。上Facebook一問，有當地人建議，未到4級係唔洗走嘅。即係哩個又係碎料啦。正當我擔心會不會嚇親俾我地逼咗過來台灣居住嘅BB嫲嫲時，佢走出房間講咗句：成日震，好煩呀！就翻去訓覺嘞。
不過當晚，位於震央嘅花蓮就有7級強震，建於1977年嘅統帥大飯店及1991年嘅雲門翠堤大樓嚴重受損，新聞圖片顯示整座大樓傾斜，一二樓唔見咗。哩次地震造成17人罹難，291人受傷。不過，統帥大飯店嘅住客全部獲救，只有響一樓嘅一名員工罹難，雲門翠堤大樓則有14人罹難。花蓮剛好位於歐亞板塊與菲律賓海板塊的聚合帶，係一個地震頻繁嘅地區，今次兩座大樓剛好建在米崙斷層帶附近，有學者批評政府當局本來就唔應該批准響哩帶建高樓，話發生傷亡事故，係人禍多於天災。有意在花蓮長期居住嘅朋友要多注意搜集資料，避免住響斷層帶上的老舊大廈。
(Photo by Andrew Buchanan on Unsplash)