遺產稅
台灣係有徵收遺產稅嘅。如果「被承繼人」（即係死者）在境內有資產，無論係唔係國民都需要繳付遺產稅。如果係台灣國民，經常在境內居住，連境外嘅資產都要徵稅。遺產總額扣除「免稅額」及「扣除額」之後，會按下表嘅稅率計算應納稅額。遺產總額除咗係計死者死時嗰一刻的資產之外，死前兩年轉移俾其他人嘅資產都要計算在內，所以冇得話臨死前㩒下個 Transfer 制，轉曬啲錢俾啲後人，避免被徵收遺產稅。
「免稅額」是台幣12,000,000 (2022年調升至 13,330,000元，即是話，如果總遺產唔超過呢個數，就唔使俾遺產稅啦。
| 遺產淨額 | 稅率 | 累進差額 |
|---|---|---|
| 0 ~ 50,000,000 | 10% | 0 |
| 50,000,001 ~ 100,000,000 | 15% | 2,500,000 |
| 100,000,001 | 20% | 7,500,000 |
表一：2020 年遺產淨額及稅率
延伸閱讀：
贈予稅
想趁自己在生時，將資產轉移俾仔女，節省遺產稅？可以嘅，不過要注意有贈予稅哩個稅項。夫妻之間互相贈予免付贈予稅，贈予其他人有 220 萬嘅免稅額。哩 220 萬嘅免稅額係計俾錢果個人，唔係收錢果個人，所以收錢果個收幾多都唔使俾。(2022年調升至 244萬元) 另外在子女結婚時，父母會有多 100 萬元嘅免稅額，贈予結婚嘅子女。
睇翻下表所列嘅贈與稅率，其實贈予稅個稅層低於遺產稅，要節省稅款，要分開好多年咁俾。
| 贈與淨額 | 稅率 | 累進差額 |
|---|---|---|
| 0~25,000,000 | 10% | 0 |
| 25,000,001~50,000,000 | 15% | 1,250,000 |
| 50,000,001 或以上 | 20% | 3,750,000 |
表二：贈與稅稅率
不動產的稅項
在台灣，從獲取房產（包括購買、接受贈予、繼承）、持有、到出售，都會涉及一啲稅項。接受贈予時，贈予方要支付贈予稅，繼承房產時，亦會被納入遺產，計算遺產稅。哩兩個情況，上面都講咗嘞。購買房產時，會有「契稅」要支付。持有物業時，每年要支付「地價稅」及「房屋稅」，如果物業總價超過8,000萬元，乃鋼筋混凝土結構之住宅，就會被視為「高級住宅」，「房屋稅」稅率會高一啲。哩啲都係買樓時即時要俾嘅稅，睇樓時可以問地產經紀。
我覺得有兩個稅項要了解咗先至決定要唔要買樓，就係「土地增值稅」及「房地合一稅」。
土地增值稅
台灣嘅稅局會將土地及上面嘅房屋分開徵稅嘅。如果土地有升值，在賣出時獲利，就要支付「土地增值稅」。對於買樓自住，同時符合一啲條件嘅，係可以有優惠嘅10%稅率，而且在重購物業自住時可獲退稅。稅額計算公式如下：
自用住宅用地稅額 = 土地漲價總數額 X 10%
「土地漲價總數額」就係用以下公式計算，都幾均真嘅：
土地漲價總數額 = {A}申報土地移轉現值 – {B}「原規定地價」或 「上次移轉時所申報之土地移轉現值」X 「台灣地區消費者物價總指數」/100 – {C}(「改良土地費用」＋「工程受益費」＋「土地重劃負擔總費用」)
我對哩條公式嘅理解係，土地嘅升值有好多原因，其中因為通貨膨脹而升嘅，唔算真正升值，所以要將買入時嘅地價轉成現時嘅幣值黎扣減{B}。另一個原因就係地主對土地進行改良，付出成本而獲得回報，令土地升值，屬於地主嘅功勞，唔應該被徵稅，所以亦要扣除。最後嘅「土地重劃負擔總費用」我就唔可以憑字面去了解嘞，總之都係啲免稅額，有著數嘅嘢。而國家嘅繁榮令到土地升值，就要交一啲稅同國家分享嘞。
自用住宅用地嘅稅率就係 10% 啦，咁其他嘅稅率就要成 20% 至 40%。計算方式都幾複雜，我又未打算去買地，所以都冇咩腦力去研究嘞。
房地合一稅
房地合一稅從2016年1月1日開始實施。實施之前幾年就已經開始循序漸進地改善兩個特別嘅情況。第一，以往一個房地產交易會涉及嘅地價金額，係由政府某個部門頒布嘅，所定嘅價值通常低於市場價格不少。第二個特別嘅情況係，房屋嘅交易金額在若干年前係經常被報細數嘅，後來開始嚴厲實施「實價登錄」，從此房地產交易嘅價格就好透明。Google 一下實價登錄，就搵倒哩個 site，可以免費搜尋樓盤嘅成交價。但係千祈唔好俾個名誤導咗，以為房地交易嘅稅金係一齊計嘅。睇睇條公式：
買賣取得之房地所得稅 = (房地售價 – 買進成本 – 費用 – 「土地漲價總數額」) X 稅率
即是話買賣房地產獲利要繳稅啦。而「土地漲價總數額」就喺上面土地增值稅嘅部份提過嘞，放喺哩條公式入面去扣除獲利嘅金額，就係要免除土地升值嘅部份，不要重複計稅。根本就唔係「合一」計算，都唔知點解叫房地合一稅。不過大家要注意嘅係，台灣嘅房地合一稅是對於買賣房產有獲利才會徾稅，而香港嘅「從價印花稅 (AVD)」、「額外印花稅 (SSD)」、「買家印花稅(BSD)」，則是以間樓嘅交易金額計算，無論賺蝕都要俾。
咁個稅率係幾多呢？如果是自住房屋，又符合一啲自住嘅規定，稅率就是 10%，有免稅額 400萬。如果是換樓住，仲可以退稅。
其公式如下：
自用住宅房地所得稅 = (房地售價 – 買進成本 – 費用 – 「土地漲價總數額」- 400萬) X 10%
如果唔係自用嘅，就冇 400 萬免稅額。根據最新鮮滾熱辣2021年4月9日立院三讀通過嘅房地合一稅2.0，將於7月1日實施嘅稅率會如下表：
| 年期 | 2年以內 | 5 年以內 | 10年以內 | 10 年以上 | |
|---|---|---|---|---|---|
| 境內居住者 | 稅率 | 45% | 35% | 20% | 15% |
| 非境內居住者 | 稅率 | 45% | 45% | 35% | 35% |
表三：房地合一稅 2.0
講開非境內居住者，台灣係有管制外國人及大陸人在台灣買樓嘅。俾兩條 link 大家 click：
睇咗呢啲資料，大家仲有冇興趣喺台灣炒賣樓宇呢？
另外，由於房產一般持有期比較長，會有好多房產在舊制時買入，新制時賣出，計算比較複雜，不過都唔會關我事，所以都唔去研究嘞。
延伸閱讀：
總結
總括黎講，台灣嘅稅務比香港略為複雜，稅率亦都略為高少少，但是尚算合理。稅局提供俾我地嘅一啲節稅途徑，我哋都唔使咁客氣，有得用就用啦。最後祝大家在台灣撈到風生水起，賺多啲錢，分多啲俾政府。
Photo by Scott Graham on Unsplash