衣食住行，行都係生活嘅重要一環，今次就同大家分享一下我在台灣買車養車嘅經驗。
駕駛執照
我响香港已經考咗棍波貨Van同埋電單車棍波車牌，只要在香港做咗車牌驗證，來到台灣做個簡單嘅驗身（體檢診所睇哩個link），然後就可以去居住縣市嘅監理所、監理站申請駕駛執照，唔使另外再考試。我地住台北，平時閒日去申請，都係15分鐘左右就攞倒駕照。咁我嘅貨Van棍波，電單車棍波換倒啲咩駕照呢？就係「普通小型車」同埋「普通重型機車」。
我嘅「普通重型機車」牌淨係可以攞來開250cc 以下嘅電單車，開唔倒400cc 嘅 Super Four 嘞。普通重型機車就係街最常見倒果啲白底黑字嘅車牌（license plate）嘅機車。成日聽到啲台灣人話開「白牌車」，如果講緊機車，就應該係哩啲車嘞，唔好同開自用車從事非法接載乘客行為嘅「開白牌車」混淆。如果想開大馬力小小（250cc以上）嘅機車，就要去考大型重型機車（黃色或者紅色車牌）。哩啲車就可以行啲快速道路，但係仲未可以行梅花嘜嘅高速公路。由於大型重型機車係要特別去考牌，有比較熱心發燒嘅人先至會去開大型重型機車，再加上台灣政府對機車政策有啲爭議，產生咗啲凝聚力，出現咗啲意見領袖，例如「火花羅」。雖然我冇在台灣開電單車，我都好鍾意聽佢地嘅 podcast，了解多啲台灣嘅民情。佢仲有 YouTube channel 架，鍾意睇嘅就去睇下啦。
講翻買車先
當時我在香港預計，在台灣開嘅 Hea人公司，間中要運送啲比較大型嘅行李，已經諗定咗要買架貨Van架嘞。在台灣有咩貨Van呢？機場接送嘅，成日見嘅 Volkswagen T6，比較新引進台灣嘅有 Hyundai Starex，仲有Ford Custom Turneo（都係5年前嘅事啦，都唔算新）。哩三款車，會裝三排櫈，可以坐成8-9人。本來韓國車我就麻麻地，不過有香港朋友極度鍾意佢係後驅車，強烈推介，即管去睇下啦。睇完都係冇咩興趣，第三排櫈鎖死咗，想拆就要用士巴拿拆螺絲，好唔方便。Volkswagen 就好好多，歐洲生產，啲櫈可以隨時摺起，不過靠背冇得獨立調校角度，要同隔離位傾掂數，最慘係第二排櫈淨係可以開一邊門，好唔方便。最後鎖定左買 Ford 嘅 Custom Turneo（台灣改咗個中文名叫「旅行家」），香港都有叫做 Transit Custom，好似淨係裝咗兩排櫈所以唔同名。我貪哩架車啲櫈比較豪華，可以獨立調校角度，拉一拉條帶就可以摺起，仲可以隨時拆出黎，第二排仲可以開兩邊門，夠曬方便。架車係土耳其生產嘅，查翻 wikipepdia，哩個系列在1965年已經有嘞，應該好穩陣。其他野我就唔識嘞，我在香港都係開啲十年車齡嘅 Toyota、Mazda，冇咩要求。
不過咪住！我個駕照淨係可以開「普通小型車」，開唔開倒架貨Van架？另外架車咁高入唔入倒屋企個停車場架？原來响台灣，咁大架車都係攞「普通小型車」嘅牌，OK嘞！至於屋企個停車場就寫明有2米嘅 head room。我專登落去停車場行一圈睇倒有架同類型嘅車，就放心可以去馬嘞！
我去Ford嘅陳列室睇完車，個 Sales 話過多一兩個月仲有新出自動波（手自排），我梗係等埋自動波先買啦。於是我就叫個 Sales 到時有車就搵我啦，我想買架。過咗兩個月都未有聲氣喎，我打電話去問個 Sales 啦，佢話仲未有。我再等多一個月又未有聲氣⋯⋯我見個 Sales 咁忙就唔好意思騷擾佢啦，於是我打去另一間分店問。間分店派咗另一個 Sales 跟，我就叫佢做 「All Back」啦，因為後來我每次見佢都係梳住個 all back 靚頭。All Back 就跟到好足嘞，架車幾時有，運到邊，都有主動同我講。架車要貼隔熱紙，改皮座椅都幫我跟埋。我約好時間之後就可以去俾錢開架車翻屋企。由於我仲未係好放心個停車場嘅 head room ，特別係落斜時個尾會蹺起。我請 All Back 來幫手睇，佢二話不說就應承我嘞。就係咁，我在台灣就有車用嘞，仲可以趕在 No. 2 出世前準備好。
小型車牌照種類
講到哩度，同大家講一下一樣好重要嘅野。萬一做錯咗翻轉頭就會好貴架啦，我都係買咗架車之後先至搞清咗少少嘅。原來我地買車可以用自己或公司嘅身分去買，個 license plate 係白底黑字，屬於自用車，唔可以營業接載乘客，亦唔可以攞黎開Uber。另一類係出租車，就係類似我地台灣旅行時，同啲和運、格上租車黎自駕游嘅。哩類型嘅車嘅車牌就係白底紅字嘅。我地買車時可以同啲租車公司簽定長期租賃合約，以佢地嘅名義買車，架車就係我地長期使用，租夠一段長時間架車就會轉翻俾我地。感覺上有啲似供車會，但係內裡仲有一個重要功能：就係架車隨時可以變成營業車輛。因為架車根本就係一架出租用汽車，而响台灣要做包車生意，機場接送開Uber等等，就係要用哩種牌嘅車再加一個職業司機。聽講考職業司機牌要攞咗身份證先至可以考，不過都係等一年姐。
講到哩度，我就開始冇咁熟嘞，有興趣做哩行嘅朋友，自己再詳細啲研究下。 台灣响哩方面係有監管嘅，但係個市場係好自由嘅。我都有聽過啲台北的士司機話退休後佢將自己用開嘅車改一改，去「靠行」（即係掛個牌响一間車隊），考埋相關嘅駕照，就可以開工揸的士。我後來問 All Back 可唔可以改翻白牌紅字嘅車，佢話唔係唔得，不過好貴之麻。後來我諗下覺得都冇咩必要就算啦。後尾又發現白底紅字車，原來有地方唔泊得車。例如我去某間大學上啲夜間興趣班，可以申請泊車證，不過就指明唔俾白底紅字車牌入。哩個情況就真係好少見嘞。
駕駛環境
香港開右軚車，台灣開左軚車，道路系統掉轉咗會唔會唔慣呢？呵呵呵，我就完全冇問題嘞，可能因為我一開始係先開電單車啦，冇分左右軚。又或者可能因為我天生 left handed，後來俾人改咗用右手寫字揸筷子，已經好習慣改黎改去。話時話，我考倒車牌後第一次開車，都係响台灣旅行時租車自駕遊，當時已經十分欣賞台灣嘅高速公路。
要適應左軚車，我其實有個心法，就係司機要同對頭車嘅司機最接近，乘客位同行人道最接近。
台北市內環境
在市內開車最需要克服嘅就係同啲機車（即係電單車）相處嘞。好彩佢地勝在起步快，在每一個燈位前都有一個大長方型俾佢地停，轉綠燈時佢地就會好似一堆黃蜂咁飛走曬，所以影響唔大。要注意嘅係台灣實行車種分流，左線好多時都禁行機車，右邊有時會有一條機慢車道，好多時啲機車習慣或者被迫靠右邊行，我地右轉時就要特別小心有冇機車攝入嚟。
初初開車時，我發現大部份嘅十字路口冇黃格仔，唔小心就會停咗响路中心，有一次轉咗燈行唔切，旁邊啲機車即刻飛撲過黎，前面有位都唔敢行，唔係就會撞霖幾架。好彩有兩部警察機車經過，指咗條路俾我行。
台灣有啲地方係冇人行道嘅，尤其是响舊區或者台北市以外嘅地方，馬路旁又通常有人泊咗啲車响度，行人被逼要行在馬路上，大家開車時要多體諒哩啲行人。
在台灣，行人過路燈綠色時，轉彎嘅車都可以行嘅，條件是行人優先。但是，經常睇倒新聞報好多行人過馬路時，被車撞到，說是司機被車嘅「A柱」（即是擋風玻璃兩邊嘅框框）阻擋視線，見唔倒行人而撞到。我初時心諗，個司機個頭係唔通唔識郁嘅咩，鎖左响張櫈上？後來有關心台灣行人安全嘅智者聰明地指出，哩個係斑馬線位置的問題。台灣的斑馬線都是貼住十字路口嘅邊邊畫嘅，四條斑馬線剛好可以連成一個四邊型。汽車在轉彎時，視線就真係岩岩被「A柱」阻擋住，睇唔倒斑馬線上的情況。只要將斑馬線移離開十字路口，汽車完成轉彎後就剛好對正斑馬線，咁樣視線就唔會被「A柱」阻擋嘞。但係宜家大家開車時就要注意，睇清楚啲。
斑馬線移離開十字路口，仲可以令行人過馬路遠離同方向嘅車輛，縮短斑馬線長度，減少行人過馬路的時間，減低在馬路上的高風險時間。真係唔知點解個政府唔去理。
最後要注意嘅係台灣有好多巷弄，有啲巷弄雖然夠闊俾架車行，但係兩邊都會停滿啲機車，唔熟地頭，千祈唔好隨便行入去，萬一被困，就會好麻煩。
除咗以上哩啲要注重外，在台灣開車係好方便嘅。好多大型商場、遊樂場、博物館都有大型停車場，收費合理，有些少消費就可以免費停車。路邊有時都會有停車格，攞翻架車時就會見倒有張紙夾在水撥中間，放心，唔係抄牌，只係一張收費單，攞去便利店交錢就可以，亦都可以辦自動轉帳。不過如果去啲舊區，停車場嘅 Head Room 就會比較低，我架貨Van就入唔倒去嘞。
市外開車
省道（標誌：藍色盾牌型）
提到市外開車就最開心，因為可以出去郊外玩啦。整個台灣都有維護極好嘅省道連接住。由台北市中心出發，個零鐘頭就可以去到北海岸及東北海岸，淨係响條路上面開車都覺得爽。往東行就可以行連接台北宜蘭嘅北宜公路，中間可以經過出產包種茶嘅坪林區。北宜公路上上落落，彎又多，吸引好多電單車發燒友假日來片彎，比較危險，如果哩個時候想去宜蘭，行3號高速公路就快捷又安全。
如果想睇山景，開車向北上陽明山，向南上東眼山等等⋯⋯一日來回就可以。如果自問技術好，開車去中南部上清境和海拔3275公尺嘅武嶺，風景一流。
高速公路（或者叫國道，標誌：白梅花綠色邊，中間數目字）
整個台灣本島，由極北至極南全長520公里，人口集中在西邊比較平嘅地方，其中基隆至高雄都有1號高速公路連接，全長374公里，方便城際交通往來。單數編號嘅高速公路主要係南北走向，雙數編號主要係東西走向。高速公路自2013年起全面採取電子收費系統ETC，車主可以去ETC服務站開個account，將張透明貼紙貼在車頭燈上，出入高速公路就可以自動感應繳費，account裡面啲錢扣到咁上下，系統就會發出短信，就要去便利店用部iBon/FamiPort機入錢。如果冇申請 ETC 呢？高速公路上個收費系統都會記倒你個車牌，知道要收你幾多錢。車主要三日內主動去便利店嘅iBon/FamiPort印張單出黎去收銀度俾錢，一過咗期就要罰錢。成日要提住自己去交錢，好煩，所以我會建議大家一攞到車就即刻去申請ETC。台灣嘅高速公路收費好低，好似市內行走唔超過某個里程係免費嘅，唔似香港，過海啲隧道費就夠甘啦。我响哩度入咗兩千元台幣成年都未用曬啲錢。
要去外縣市，記得要留意車潮。台北市有好多由其他縣市黎工作嘅人，每逢週末都會翻屋企見下屋企人。另外，遇到一啲長假期，台北市內嘅居民都會出去玩，兩樣加起來就會出現特大車潮，產生大塞車，平時行一個鐘嘅車程變咗行三四個鐘。大家計劃行程時，錯開哩啲時間就唔使浪費時間，唔使响架車度坐到急尿都冇得去廁所。鍾意嘅話可以上哩個 site 睇實時情況。為咗舒緩塞車情況，增加運載效率，高速公路會有一條 HOV線（High-Occupancy Vehicle），淨係俾巴士、的士、同埋坐咗三人以上嘅私家車行。會用紅外線偵測車上人數。
我行高速公路最多嘅係往來台北同桃園機場，距離四五十公里，感覺還可以。不過有幾次要去新竹台中傾生意，要跑成100-160公里路，真係開始頂唔浦。
跑長途，一定要提台灣嘅服務區或休息站。我第一次行入去，對於佢嘅熱鬧繁盛感到極度驚訝。原來哩啲服務區休息站可以大到成座商場咁。位於台中嘅清水服務區係全台灣最大嘅，有大大小小車位800個，男女廁所有幾百個廁格尿兜，乾淨冇異味。隔離有個大 Food Court，又有賣當地特產做手信伴手禮嘅 Counter，同機場客運大樓有得 fight，每年營業額可達 7億台幣。有啲服務區仲有24小時免費休息室，有地方俾司機沖涼，有躺椅俾司機小睡一下。此乃德政也，可以避免疲勞駕駛，減低交通意外風險。
講到哩度，又要提一提而家啲車有一樣非常正嘅新功能：自動跟車跟線。原來今年（2021）出嘅新車已經裝咗哩兩個新功能。架車可以自動跟住前而嘅車，保持一定距離，前面開快啲，架車就會自動開快啲，距離太近就自動煞慢架車，軚盤佢都幫你控制埋，只要你唔打方向燈，佢就會幫你沿住條行車線行，唔使打醒十二分精神睇下前面有冇塞車要減慢速度， 咁樣開車就唔使咁傷神嘞。唔好以為哩啲功能好貴呀， 我上網望一望我嗰架車，今年已經可以選哩個功能，唔使特別加太多錢架。基本上已經變咗基本配備， 唔怪之得哩排啲汽車嘅chips咁缺貨啦。
養車使費
最後同大家講下啲使貴嘞。以我哩架柴油貨Van為例啦（其實都係一架自用小型客車）：
牌照稅：每年 11,230 元
汽車燃料使用費: 每年 3,708 元
保養換機油：每半年 6,000 ~ 10,000元
柴油價格：每公升 25~26 元 (平過香港好多架)
無鉛汽油價格：每公升 25~30 元
保險: 全保第一年大約 40,000元一年，之後慢慢減。全保有分同其他有牌照車輛撞同埋其他嘢撞。如果淨係買第三者強制險就會平好多，但係台灣嘅強制險嘅保額係好低嘅，記得加大個保額，否則唔小心撞到架名貴跑車撞，份保險就唔夠照架啦。
超速: 罰1600元
紅線違規停車: 罰 600-1200
大致係咁，下次再傾。
(Photo by Anton Darius on Unsplash)