No. 2出世當日，婦幼診所俾左間病房我地安頓好後就入手術室嘞。我在外面等時，見倒劉華醫生搭lift上來，入咗去幾分鐘後，護士就抱住No. 2俾我睇嘞，係我未定神之前，唔知點解佢就響我面前數齊10隻手指10隻腳趾，跟住就抱翻入去BB房。
見完老婆出翻來，我就要翻屋企湊仔，外母來接更，佢見倒啲伙食就即刻放心曬，賣相係酒店級嘅，味道我就唔知嘞，我老婆就話超正，日日有期望。診所會預期產婦食完餐飯，會有親友幫手將啲餐具放翻去回收窗口。嘻嘻，台灣人真係好有自己執嘢嘅習慣，有一次我去Burger King食完嘢，諗住好有手尾執曬啲嘢去俾翻收銀啦，當我expect佢同我講聲「謝謝」嘅時候，收銀打咗個凸，然後話回收處在另一邊。估唔到一間私家醫院都有哩個制度，好事好事。
喂奶呢，就打個電話去BB房通知佢地準備，然後帶證件去換個BB翻黎，餵夠玩夠就推翻入去。親友想幾時睇BB就幾時有得睇，每日仲有固定時段可以透過CCTV睇BB。呀仔周圍玩，醫院唔鼓勵俾佢掂BB，所以佢第一次見細妹就係睇電視。香港啲醫院就緊張啲，除咗媽咪可以隨時入BB房餵奶之外，爸爸想抱BB都係限時限刻，唔可以帶去病房，其他親友想睇就唯有定時去「金魚缸」睇。記得香港好多年前曾經有個傻人入去某間醫院抱左人地個B，好彩後來搵得翻。香港人口稠密，要靠好多制度黎維持秩序，好多嘢就會變得好嚴密，少咗啲人性化，都可以理解嘅。
婦幼診所仲有一樣正嘢係唔使加錢就有嘅：按摩通乳。好多人會擔心全母乳BB會唔夠食，其實呢，真係好少會唔夠奶架，不如擔心下塞奶好過啦。雖然乳腺隨住BB嘅需求去分泌母乳，但是，有時食唔曬，或者產婦食咗啲令乳汁太濃稠嘅食物，累積咗響入面就會塞咗。哩個時候就要搵個有技術、有經驗，受產婦信任嘅人用無情嘅力將啲奶唧出黎。我老婆話塞奶之苦就如胸前有個大暗瘡，發緊炎，只要輕輕碰一碰就會痛到飛起，唧出黎通翻佢先會舒服啲，等果一部份嘅乳腺啲奶可以俾BB吸出來。啲護士見倒我老婆有塞奶嘅跡象，就會好主動咁安排有經驗嘅同事幫佢唧奶。香港好似都有哩啲服務，收費就當然唔會低。
住咗婦幼診所四、五日就出得院嘞。埋單15萬台幣，即係約港幣3萬8千，唔錯唔錯。住私家病房，開刀，哩個價抵啦。我覺得自己慳咗幾萬蚊呀。不過，慳咗嘅哩筆錢我地後來使凸曬。點解？一匹布咗長，遲啲解釋俾大家聽。
到坐月嘞。台灣最豪華嘅有月子中心，俾產婦及初生嬰兒入住，所有日常生活，照顧嬰兒嘅工作都有人幫手，咩都唔使做唔使諗。有啲就連個No. 1，甚至老公都幫你睇埋。收費起碼十幾萬台幣一個月，換算成港紙要好幾萬。我地屋企有兩大護法，我呀媽同外母，人手夠多，就唔使使哩啲錢，淨係去訂咗月子餐——專門為產婦而設嘅外賣餐飲服務。當然話有搵營養師設計餐單啦，每日新鮮料理，諸如此類，幫助產婦調理身體，仲可以每日送兩三次。有咗哩個餐，我外母就只需要照顧No.1嘅伙食，屋企其他成員食咩junk food都冇問題嘞。
台灣嘅嬰兒用品同香港有冇唔同呢？對於我地黎講，係一模一樣嘅，埋又係去IKEA買家私（唔好以為IKEA啲嘢流喎，人地要賣去歐美國家，要通過曬咁多國家嘅安全測試架），去Uniqlo買BB衫，去超市買日本尿片。我響香港就搵 Wikipedia Wong訂尿片，在台灣就上 Costco訂囉，都係成箱咁送上門。所以呢，globalisation 都有佢嘅好處架，我地唔使盲摸摸咁去搵。
台北生仔記就講到哩度，遲啲同大家講下在台北湊BB嘅事啦。
(Photo by Ignacio Campo on Unsplash)