本站志在分享台灣生活嘅第一身經驗，我地居住台北市，所以，討論內容主要都係講緊台北嘅情況，至於其他地區係點，就要等其他朋友嘅分享嘞。
話說我地在台北生完 BB No. 2，老婆坐完月嘞，開始要自己湊 BB 嘞，就同大家講下在台北湊 BB 嘅環境。有睇上一篇「台北幼兒園」，就會知道，一般情況下5歲前入讀公立幼兒園嘅機會唔高。我地亦唔想放佢地响私營托兒所，所以BB出世到抽到公幼前都打算自己湊。
醫療環境
No. 2 滿月後嘅醫療追蹤同香港嘅差唔多，都係定期去自己所屬行政區嘅衛生所打預防針。唔同嘅係 No. 2 身分比較尷尬，未有健保卡，成日要同啲職員解釋原因。由於台北人口冇咁稠密，相比於 No.1 去香港嘅母嬰健康院，我地同 No. 2 去打預防針係舒服啲、冇咁緊張嘅。時間又快啲，空間又多啲，又有志願義工幫手打點，有啲衛生所仲有得免費泊車。另外，我地平時去屋企附近診所睇醫生，都係唔使等10分鐘就有得見醫生。
No. 1 同 No. 2 都係有黃疸退得慢嘅問題，但係各有唔同原因。在香港時，母嬰健康院見 No.1 未退黃，為安全起見即刻緊急 refer 我地去醫院驗血，好彩都係確認冇咩事，講真香港嘅醫療真係唔錯。No. 2 呢就原因不明，我地間婦幼診所嘅醫生 （台灣叫醫師，跟住落黎，提到台灣嘅醫生，我都會跟台灣叫翻做醫師）refer 咗我地去馬偕兒童醫院肝臟專科跟進。入到去醫院，嘩！嚇嗱死！勁多人，人來人往。我地心諗都唔知幾時先至見到個醫生，唔知幾時先至有得翻屋企啦。醫院裡面原來都有一啲義工阿姨幫手坐 Counter 個啵，佢地會著住件背心寫住「好厝邊」（即係好鄰居咁解，台語/閩南語黎嘅）。義工阿姨好有耐性咁教我地點去醫生間診症室。去到診症室，要磅重、量頭圍，哩啲又係有義工阿姨幫手。做完就入診症室個 waiting area 報到。 醫院有個排隊制度都幾公平，每個預約症都會排先後次序，好似攞籌咁，醫師會按次序見病人，如果報到時已經過咗號碼呢，醫師會每見三個已經報咗到排緊隊嘅病人，然後見翻一個過咗號嘅病人。咁樣就可以令到啲病人有誘因早啲到，但係過咗號又唔使咁緊張。好多大醫院都係用哩種排隊方式，所以通常預約單都只係寫咗日期同一個時間範圍，並無確切講明幾點鐘前要到、逾時不候之類。醫師嘅效率超高，半日就可以睇五、六十個症。醫師有兩三個助手，快到我地時，助手就叫定我地在門口等，佢未睇完前面嗰個，我地就要入定房，減少出出入入嘅時間，務求可以節省醫師時間。為咗效率，就要犧牲少少BB嘅私穩囉。雖然醫師要見好多症，我同老婆都感覺到醫師係好有耐心、好認真咁睇症嘅。醫師認為 No. 2 問題不大，只要定期追蹤便可。雖然 No. 2 身分特殊冇建保卡，所有費用，包括照超聲波、驗血、藥費、醫師費等等都要自己俾曬，但我就唔覺得有太大負擔，感覺上，收費大約相當於香港私家嘅一半再少一啲，以後攞到健保卡，就唔使錢咁滯。有樣野我就真係好 impressed，話說醫生睇完症開咗啲藥，助手俾咗張紙我，叫我俾完錢就去藥房攞藥。嘩！一去到藥房，藥已經執好等住我去攞。原來佢地個電腦系統聯繫好曬，醫師拍 keyboard 開藥後，藥房已經收到張單可以執藥。香港啲公立醫院或母嬰健康院，通常就要個病人交張紙去藥房，先至開始執藥。多人時要等成一兩個鐘架。抽血都係架，間醫院雖然人來人往，但是每次要抽血時，攞張紙出黎去抽血站部機度嘟一嘟個 barcode，等5-10分鐘就有得抽。搞唔掂部機，就會有啲「好厝邊」阿姨行埋黎幫手。其實，俾錢交費都可以用部好似ATM 嘅機做，唔使排隊架，不過我地啱啱到台北，冇咁多銀行卡，又唔熟，所以先去 Cashier 排隊（俾錢哩個程序，醫院叫做「批價」，個 Cashier 都叫做「批價」)。
就係咁，睇完醫生攞完藥，望一望個錶，都係兩個零鐘姐。結論就係台北啲醫院效率高，收費平。
講湊BB變咗講睇醫生添，咁睇醫生哩方面對於湊BB黎講係好重要嘅，梗要講下啦。我再講下在台北市湊BB有啲咩好嘅地方，然後講下有啲咩冇咁好先。
台灣推行母乳哺育好似走得比較前，唔單止醫護人員對我地話要 exclusive breast feeding 覺得好正常，好多其他本地媽媽都係諗都唔使諗就純餵母乳。好多商場，地鐵站，政府機構，展覽館等等，都有哺集乳室，俾啲媽媽餵奶或者泵奶。而大部分哺集乳室都會有水機，有熱水、溫水甚至冰水俾你用。水機在台灣就真係好平常，火車站呀，廟宇呀等等地方，都會有水機俾大家用。最勁嘅係，有啲哺集乳室仲會有尿片免費提供，以備不時之需。而除咗哺集乳室，好多公眾場所仲會有親子厠所，裡面有啲小馬桶、小尿兜，俾啲細路用，有啲就有張BB櫈，俾BB安全地坐住，咁大人就可以好放心咁用個厠所。如果冇，啲傷健人士嘅厠所都好大好乾淨，地面又乾燥，幫 No. 2 換片都冇咩問題。有一次，No. 1 突發想去厠所，我去消防局借，佢地都好樂意借俾我地。因為個城市冇咁 Chur，啲人都會對細路比較寬容，見你湊住個細路，都會想幫下手。台灣比較多全職媽媽，好多時都見到一個媽媽湊住兩個，身上孭住一個細嘅，手推住BB車有個大嘅。響哩啲環境，真係會容易啲。有個幾有趣嘅現像係，好多服務市民嘅政府機構，都會整個玩具角，等啲爸爸媽媽帶住啲細路辦手續時，可以等啲細路有啲細藝，唔使悶得滯而扭計，大人就可以專心辦手續。好以廣州街移民署，戶政事務所哩啲，都有個玩具角架。有次 No. 2 專登想去玩，跟住仲有啲義工同我地講，邊度有二手免費玩具攞。
仲有，仲有，生仔有錢派！因為台灣出生率低，政府鼓勵生育，生BB後，5歲前每月會有資助托兒或者幼兒園費用，如果自己湊就有現金津貼。唔同戶籍地區有唔同嘅金額，在台北市，年收入唔超過NTD1,200,000，每月就NTD2500津貼，不過要在台北設戶籍一段時間之後先至可以申請到。另外，仲有健保費減免。在一個戶籍內，第五個及以上嘅成員唔使交健保費。我地個戶藉內有5個人，我淨係需要交4個人嘅健保費。YAY! 真係後生啲，生多一兩個添呀。
人行安全
講咗咁耐好嘢，等我講下啲我認為台灣需要改善嘅地方：首先就係路面交通問題嘞。台灣嘅交通燈，即使行人過路燈係綠燈時，一樣係會有左轉車或者右轉車行過黎嘅。原則上，汽車就點都應該禮讓行人，避免意外，人行燈綠色時就更加要先俾行人過馬路啦。不過，台灣啲司機安全邊際概念比較低，司機認為自己夠快，攞位攞到盡，夠位過就過，而行人見倒咁大架車行埋黎就一定會讓三分啦，於是好多司機都好老馮咁，預咗行人一定會俾佢過，所以掂行掂過，有時候，俾啲車過曬後，行人過路燈都轉紅燈囉。習慣咗行人綠燈一定唔有會車嘅香港人過過下馬路，見到都有車來，就會嚇一嚇，仲要有啲司機攞到咁盡，就會覺得好危險。老人家帶細路過馬路就更加擔心。
令事情更加複雜嘅係啲綿羊仔（本地人叫「機車」)，機車在路面上穿來插去，令到路面情況更加複雜，有時啲汽車冇位過停咗，而機車夠位過，就會突然穿出來，所以過馬路時要特別小心睇清楚。哩啲道路安全意識，一定要從小好好教育啲細路。
仲有，响一啲舊區有啲路係冇人行道嘅，雖然條路係夠闊嘅，但是，好多時兩邊都會有違例泊車，逼到啲行人要行去路中間。有時馬路兩邊會有騎樓嘅，行人在騎樓底行路就最安全。不過，推BB車就慘啲，因為樓與樓之間會有落差，要上落一兩級樓梯。曾經有台灣人發起一個「尋寶運動」，叫大家一齊去萬華大稻埕哩類舊區推BB車，睇下可以尋找倒幾多障礙物。當年要買架新 BB 車俾 No. 2 用時，見台北啲街凹凸不平，諗住個轆越大越好，容易過障礙。點知錯曬。個轆越大，架車就梗係越大架啦（心諗台灣地方，BB 車大架啲都冇所謂啦），架車咁大，就梗係重啲架啦，雖然架車係好好推，但是上落一兩級樓梯時就麻煩嘞，真係好重。而且我地買果架 BB 車只有一個前轆，上一兩級樓梯時就好難平衡。講到尾，台北乃係一個都市，空間都係一種珍貴資源，咁大架車推入捷運、餐廳都好阻地方。所以買 BB 車，都係安全第一之後，就要盡量輕巧。
除咗過馬路要好小心外，廢氣亦都是一個問題。台灣嘅斑馬線有時前面會停咗啲兩段式待轉機車，車尾向住斑馬線，啲機車嘅死氣喉高度就啱啱同 BB 車或細路嘅高度差唔多，所以啲 BB 細路就好容易會受曬啲廢氣。有時會有機車偷懶開埋上人行道搵位泊車，想避都冇得避。聽講以前好多機車都係二衝程引擎，排出嘅廢氣更污糟，好彩而家禁曬，用曬四衝程引擎。而家政府仲補助市民改用啲電動機車，零廢氣。最近一年仲通過咗空氣污染防制法，淘汰一啲維修不良、廢氣大嘅老舊汽車機車。
對於台灣道路設計問題，本地好多有識之士都會大力提出意見，例如哩位 Leo，係讀都市計劃嘅年輕人，經常發表有建設性的意見。仲有哩個 Aye Taiwan，都好有見地。
有自由嘅傳媒，民選嘅政府要為選民負責，台灣正朝著正確方向前進。好似啲騎樓底梯級嘅問題，我地都有發現慢慢都加咗啲斜路方便輪椅及 BB 車上落。
我地住落台北一個住宅區三年嘞，台北嘅交通要徹底改善，仲係前路漫漫。好彩台北市人口密度冇香港咁高，慢慢我地就熟習咗環境，知道邊條巷少啲車，行邊條路可以避開啲繁忙嘅路口最舒服，到邊個路口先至要特別注意，帶小朋友出街就輕鬆好多嘞。
公共交通
响台灣，六歲以下乘搭公共交通工具，包括台鐵、高鐵、捷運及巴士，一律免費。每一個捷運站都一定會有一個出口設有升降機（叫「博愛電梯」），大廳、月台、轉車嘅動線，一定會有升降機或斜路連接，坐輪椅、推 BB 車一定唔使上落梯級。巴士方面，有啲車係低地台，前半部有大空間可以停輪椅或 BB 車，有啲巴士就要上兩三級梯級，而且走廊狹窄推唔到 BB 車入去。巴士司機好多都趕頭趕命，間中都會幾乎俾佢道門夾到。雖然乘客都有讓位俾老人家及照顧兒童嘅好習慣，但係都唔建議老人家帶 BB 搭巴士。台北嘅公共交通，繁忙時間及非繁忙時間區分明顯，到咗非繁忙時間就可以同啲 BB 遊車河，火車及捷運都得，特別係高架嘅文湖線係無人駕駛，第一卡第一個位可以望倒前面，有好多 BB 坐响度扮揸車架。經過市內嘅松山飛機場，仲可以去觀景台睇飛機架。
出街食飯
台灣有好多平價美食，可惜我地湊住兩隻 BB 唔可以成日享受到。因為哩類鋪頭通常都係俾張摺凳你坐，啲 BB 坐唔定，夏天又冇冷氣熱辣辣，只能夠買外賣返屋企食，所以去遠啲地方就唔揀得呢類食檔。前兩年有網傳話好多台灣餐廳好鍾意用嘅「美耐皿」碗碟食具好毒，經「台灣事實查核中心」調查後發現， 哩個傳聞有標題黨誇張失實之嫌，誤報數據，將生產美耐皿工人有腎贓問題同用家混為一談，有誤導成份，俾佢嚇咗一野。美耐皿在美國台灣都可以合法使用，高於攝氏70度才會釋出三聚氰胺，只要避免直接放入微波爐加熱或者打邊爐時放落個煲度煮埋一份就好安全架喇。我地去開間打邊爐餐廳就分得好清楚，筷子匙羹會放落去個煲度夾嘢食，裝啲啱啱煮熟嘅嘢就用不銹鋼碗，生嘅食物就用美耐皿裝。（參考：《什麼是美耐皿樹脂餐具？為何目前只有台灣廣泛討論美耐皿的風險？》）
如果想要間餐廳有 BB 櫈，可以舒服啲食餐飯，就要去啲中價餐廳（每人200-300台幣）嘞。哩類餐廳有時都會預咗大人叫一份，然後分俾啲細路，所以待應一般預你只叫大人嘅餐。我地哩兩個香港人大食，而且我地對 BB 們實行 Zero 零食政策，所以啲 BB 到咗食飯時間就會好大食，兩個一齊食曬一個大人餐絕對冇問題。有時點餐叫多過兩個餐，待應都會呆一呆，然後再三確認 order。有啲餐廳就會收兒童共餐附加費，有啲就有兒童 menu。一啲唔係太繁忙嘅大型商場嘅 food court，都會有BB櫈，搵倒位之後自己搬來用就可以。
想搵啲嘢應酬住啲 BB，俾自己安靜一下休息一下嘅，有啲再貴啲嘅餐廳會有個波波池、遊樂場或者玩具部。不過都唔係好work，一來唔係好放心放低佢地，二來啲 BB 都仲係好黐身，三來哩啲餐廳啲嘢食通常都係麻麻地。我地之前去開一間哩類型嘅餐廳都已經執咗嘞，原址變咗間日式烤肉餐廳。
(Photo by Leo Rivas on Unsplash)