室內活動地方
講完食嘢，講下有啲咩地方可以放 BB。先講下啲室內嘅，適合落雨天，或者天時暑熱時。最方便嘅就係屋苑會所兒童遊戲室，我地在台北搵屋時就係因為個屋苑有哩啲設施而貴啲都租咗落黎。响自己屋苑嘅遊戲室玩，除咗夠方便之外，仲可以認識倒啲鄰居，啲 BB 又可以有玩伴。玩厭咗想出街，屋企附近就有兩三間大型嘅室內收費遊樂場，半日300-500台幣，一般會有各種大型小型玩具，Lego，波波池，室內滑梯，繩網陣等等。有啲有用決明子取代沙嘅沙池，各適其適，最緊要係冷氣夠曬凍。除咗哩啲之外，大啲嘅細路就可以去下啲天文館、科學館、美術館等等地方，收費唔貴，又有教育性。不過我地兩個 BB 太細啦，唔係好知道發生緊咩事。
留翻最後同大家壓軸介紹嘅，係台北市政府在每一個區都有營運嘅免費好去處：「親子館」。哩啲親子館有大有細，大起上來可以容納50-60個 BB 加50-60個大人，細嘅則十零對大人加細路。親子館嘅設施同上面介紹嘅室內遊樂場差唔多，可以網上預約或者早些少去排隊入場，星期一至五，一次可以玩半日，星期六日多人去，每場只可以玩個零兩個鐘。因為唔收錢，好多要湊孫嘅公公婆婆都會好似返學咁，日日帶住個孫去哩啲親子館，久而久之大家都會好熟絡，氣氛非常之融洽。大人又有伴，細路又可以一齊玩。最好係親子館通常會安排一啲集體活動，例如講故事時間，體操時間，做勞作 DIY 等等，多姿多彩。咁其實埋就係好似香港啲 play group 咁囉？我哋發現咗有哩啲地方之後，湊細路就舒服咗好多啦。
戶外活動地方
再同大家介紹下市內嘅戶外活動地方。室外活動地方適合响春季或者秋冬時候去，夏天就要傍晚先至好去，唔係就會熱死。
最近嘅戶外活動地方，就係每個小區嘅公園仔，我地屋企附近就有三四個。有一個太近街市太污糟，有一個近廟宇，有好有唔好，唔好嘅就係會有人燒香食煙空氣污染，好處就係通常啲廟宇會有飲水機有熱水冰水免費俾大家裝。最近我地個公園比較新淨好玩，玩咗兩年開始舊舊地，最近就改建成沙池繩網架，俾啲細路爬上爬落放電兼訓練大肌肉。我發現啲細路超鍾意玩水玩泥沙，我地唔怕污糟，幫佢地搽完蚊怕水就由得佢地玩，然後可以坐埋一邊篤手機，夠鐘就幫佢地換套衫翻屋企。
另外一個由屋企行兩步路就會到嘅戶外活動場所，就係公立中小學嘅操場。過咗上課時間後，哩啲操場就會開一度窄窄地嘅門（因為唔俾人帶單車、機車入去，所以度門真係好窄），俾人入去跑步，打藍球，打羽毛球，有啲仲會有滑梯韆鞦等等嘅設施俾啲 BB 玩。哩啲操場我地都去唔少。
初春或秋末時可以去遠些少，例如大安森林公園，大湖公園，河濱草地。去做咩呢？野餐也！冇錯，就係好似香港啲外傭咁，鋪一張墊，坐一日。在台北只要有一大片草地，就可以鋪張墊野餐架啦。食咩呢？我地通常會去麥記買漢堡包或者去7仔買三角飯糰、烤地瓜，飲住杯凍咖啡睇住啲細路掟飛機，掟飛碟，玩滑步車，跑來跑去八卦下其他人做啲咩。有時人多逼逼地都冇所謂，可以順便同隔離搭下爹，吹下水，氣氛幾好架。最近 No.1 同 No. 2 仲成功在戶外午睡，所以我地都打算買個小帳篷遮下太陽，瞓得舒服啲。哩度有啲人會帶曬成套露營架撐去野餐架，一個大帳篷，一個冰桶，放兩張導演櫈…… 嘩！真係識嘆。
如果唔想咁 Hea，可以去台北動物園行個圈，就响文湖線最尾尾，搭個捷運就到。台北動物園有分八大區域，有非洲動物區，溫帶動物區，鳥園，澳洲動物區，熱帶雨林區，台灣動物區及兒童動物區。每個區域都保養得非常之好，每區之間都會有大涼亭俾我地休息下買下野食，免費補下水。我地睇動物，啲大型動物如大象、斑馬、長頸鹿等等，唔會有鐵籠隔住，視野清晰。而一定要用鐵籠嘅，就會用好幼嘅鋼線隔住，唔會好影響視線。水中動物如企鵝、河馬等等，就可以透過玻璃睇倒佢地喺水底嘅動作。咁多野睇，入場費都只係台幣60元，其實每個區收60都抵啦。我成日擔心佢收咁平，會做唔住。動物園建築係一個緩緩嘅山坡上，行得越入，就越高，所以我建議一入去，睇完大廣場嘅動物後，可以去坐無軌小火車，坐到最入面，然後慢慢由內到外逐個區域參觀，落斜路舒服啲呀麻。哩個動物園咁大，都唔使一日要睇曬咁多個區，遇著啲動物心情靚，行近俾你睇就睇耐啲啦。因為有啲動物有時會自閉下，趕過去睇可能淨係睇倒個背影，無咩謂，一次睇唔曬咁多動物嘅，得閒就黎多幾次啦。
有坐貓空纜車嘅朋友會注意到纜車有一個動物園南站。有次因為學校主題教學講河馬，專登帶佢地去動物園睇河馬啦，啲細路嘈話要坐纜車，諗住坐一個站去動物園南站應酬下佢地，原來落咗纜車，仲要再等無軌小火車先至可以參觀，唔方便。無咩必要就唔使試嘞，想坐貓空纜車就坐到頂啦。
台北除咗有動物園，仲可以去兒童新樂園及前身係火車維修廠、籌備中嘅松山機廠，哩兩個地方適合啲大個啲嘅細路去，去過之後，有機會再同大家分享。
夏天消暑解熱
夏天天氣熱，除咗去室內涼冷氣，有冇其他消暑活動呢？在台北市內可以有泳池，噴水池，沙池，親水步道，去遠啲可以去基隆和平島戲水池，海水泳池，海水浴場。
泳池方面，台北都有唔少，有私人經營，也有政府嘅，啲中小學泳池放學時間都會對外開放，內湖焚化爐仲有一個室內池，內湖居民可以免費入場。附近嘅大湖公園泳池睇起上黎環境都唔錯。睇 Google review，同一個泳池都會有兩極評語，所以入去前要睇清楚情況。泳池哩方面我就唔係太熟，因為我地社區有自己泳池，交咗管理費，梗係用翻自己泳池，所以好少去其他。講開社區泳池，我就有被佢伏咗一野嘅感覺。我地當時睇樓，入到去見倒個注滿水嘅泳池，當然好開心有加佢分啦。點知住落咗先知道佢每年淨係開三個月，6月中至9月中，而且開放時間仲好有限架。星期六日開 2:00pm – 10:00 pm，閒日就開6:00 pm – 10:00 pm。6月及9月閒日淨係開星期五。你話伏唔伏？不過冇辦法啦，哩個社區人口少，五棟大樓夾埋得百幾戶，夾錢請個救生員嘅budget有限，泳池使用率相對低，唯有限制個開放時間。聽講有啲社區直情唔開泳池，癈咗佢。所以在台灣買樓，要注意埋哩一點。
除咗泳池外，台北仲有啲噴水池、沙池、溪邊嘅親水步道，可以俾啲細路濕下身，消消暑。台北夏天乾燥，個身濕一濕水，啲水容易揮發，帶走啲熱能就涼曬嘞。唔好睇少哩啲設施呀，由 BB 到大細路都會玩到好投入好開心架。據我所知嘅哩類地方有：大佳河濱沙池，大溝溪親水公園，新北市鶯歌陶瓷博物館園區。台北市是一個盆地，四周圍都有溪流匯入淡水河及基隆河，應該仲有唔少哩類設施。
一日小旅行
寫到哩度，再加上大家慢慢 Google 下詳細啲嘅資料，應該都大把地方可以玩架啦。最後，我想講多一樣我地初初到台灣時，每星期都會做嘅一日小旅行嘞。當時啱啱買咗架車，No. 1 又未讀幼兒園，我地又唔知道市內有咁多地方可以去，對住個 Google Maps, 又睇下啲 blog 呀、Facebook post 呀，搵咗一啲地方，開長途車去市郊或者市外嘅小鎮玩。而家諗起，湊啲咁細嘅 BB 其實冇咩必要去咁遠，佢地咁細，响條街度求其見倒啲咩都覺得新奇有趣，搵條安全嘅街俾佢地行下就可以 Hea 半日。我個人覺得，同啲五歲以上嘅細路去啲遠啲嘅地方，對佢地黎講先至有啲意思。不過有架車，一開始就梗係想揸下周圍去下。以下係我印象深刻啲嘅地方：
位於金山區附近嘅一個山頭上面，有兩個室內展館，超大嘅戶外雕塑園，仲有兒童館區，夏天又可以玩水。可以俾啲細路接觸下啲美術野，培養下啲美術 sense。朱銘是何人？去過中大圖書館嘅人就肯定會見過佢嘅作品，就係門口果件叫做「仲門」嘅大雕塑。我地第一次去完之後就買咗佢嘅 annual pass。
陽明山
陽明山上有好多野可以玩，我地住咗三年有多都仲未玩曬。竹子湖有好多花，有兩排餐廳可以食土雞，價錢相宜，仲有免費泊車。擎天崗大草原，春季嘅時候可以睇到好多芒草。陽明山美軍宿舍群有好多餐廳，不過就貴貴地，消費可以換免費泊車。
基隆地區
基隆海洋廣場，一邊可以見到大郵輪，一邊可以睇到海防軍艦。和平島係一個新嘅景點，新起咗一個引海水入去嘅泳池及兒童嬉水池。
外木山海興海水游泳池是一個簡單的游泳地方，換衫唔係咁方便，不過勝在係免費，仲有淡水可以沖身。想去啲沙灘地方，開車過少少就有「大武崙情人海灘」。點解有「情人」兩個字？名嚟嘅啫，大家唔好介意。
福隆
福隆係一個度假勝地，有一條25公里長嘅環狀單車徑，大部份路段都係同汽車分隔。仲有個沙灘，時不時都會搞下啲沙雕節。
宜蘭
宜蘭就更加多地方玩啦，相信好多香港朋友都會熟過我。我比較 impressed 嘅係蜡藝蠟筆城堡 luckyart.com.tw。佢哋有一個 Work Shop 可以俾啲細路自己整顏色筆。No. 1 （當時四歲）同 No.2 （當時兩歲）都玩得好開心。不過返到屋企啲顏色筆就要收起佢，容乜易畫花晒屋企啲牆及傢俬。
以上哩啲地方，我都係略舉一二嘅啫，淨係北部地區有好多地方都未去過，仲有中部、南部，真係有排玩。大家計劃行程嘅時候，記得要留意公路上嘅車潮。本地市區嘅人，都好鍾意假日出去郊遊，週末嘅開始、完結，往返去郊外嘅路都會塞車，可以就最好錯開哩啲車潮。
(Photo by Leo Rivas on Unsplash)