上回講到，我地在台北生完個 No. 2，完成埋 No. 2 嘅移民手續，按順序，係應該講下响台北照顧初生嬰兒嘅環境嘅。但係我想講下 No. 1 讀幼兒園嘅情況先，因為自從佢返咗幼兒園之後，我有一種守得雲開見月明嘅感覺，終於都有翻啲自由嘞。No. 1 讀幼兒園之前，我地兩個大人一個老人家，在台灣湊住兩個BB，日日夜夜都要睇住佢地，淨係日常生活照顧都分身乏術，想Hea下都冇得Hea。
本來台灣係有好多托兒托嬰服務嘅，不過我地覺得自己公司草創初期，仍然處於摸索階段，冇咩生意，將啲BB送去托兒托嬰所慳咗嘅時間，未必可以攞黎賺翻倒啲錢。何況啲BB俾人凑就梗係冇自己凑咁好啦，所以都係頂硬上，自己一路帶住啲BB，一路做生意啦。
詳細講 No. 1 讀幼兒園嘅情況之前，等我同大家介紹吓，我在台北市見到嘅學前教育選擇。
台北市幼兒園有好多種嘅，除咗公立，仲有私立營利，私立非營利。私立嘅有平有貴，貴嘅就有用 Montessori 嘅，有森林大自然做主題嘅，亦有好多搵西人教英語嘅（台灣人同美國 friend啲，所以叫美語）。佢地大部份地方都唔大，缺乏活動空間，但天氣好都可以帶啲幼兒去附近公園、遊樂場活動下。哩類幼兒園收費唔平架，尤其係標榜雙語或者美語教學嗰啲，閒閒地都要兩萬台幣一個月，所以我諗都唔會諗。雖然都有比較便宜嘅私立幼兒園可以選擇，但是我心目中淨係想啲細路入讀公立幼兒園，所以就冇去留意哩啲選擇嘞。
通常公立幼兒園係附設於國民小學入面嘅，所以佢地會叫做「乜乜國小附幼」。理論上，3-5歲就可以報讀公立幼兒園，有啲仲會開埋2歲嘅幼幼班添。不過，公立幼兒園學位係嚴重供不應求嘅，需要用一啲機制去分配學位。足5歲設戶籍於同一學區嘅幼童可優先取錄，因為6歲就要讀小學嘞，最好俾佢一年適應下團體生活，同一學區亦都可以直上小學部。收咗4、5歲嘅幼兒後，都冇咩位留俾啲再細啲細路喇。另外一啲法例規定要政府幫助嘅國民亦會有優先權，例如：原住民、低收入戶、家庭成員有身心障礙、危機家庭等等都會被優先取錄，其次嘅就係政府教育機構教職員工⋯⋯正常冇咩優先取錄條件嘅細路，要入倒公立幼兒園，好難架。雖然難抽，本地台灣人都叫我地唔好放棄唔抽，因為萬一抽中咗，簡直係中頭獎呀。
公立幼兒園每年春季都會分兩個階段收生，大家計曬啲分後就可以抽籤，有剩餘學位就會留俾第二階段嘅抽。哩個時候 No. 1 四歲，冇咩優先取錄條件，但係我地都好聽話咁去報名抽籤。給果呢，就是備取第二名（成個備取 list 有過百人），要等前面兩個人放棄學位先至有得入讀嘞。咁啱我地响哩個關鍵時刻，有件更重要嘅事要翻香港做，就是幫 No. 2 搞香港啲證件。招生資料話，如果抽中的話，要家長親自去學校登記，咁即是就算有位，都唔可以去報到辦手續，所以我地都處於半放棄狀態。後來，有晚响香港，唔知為乜事我地吉咗張台灣 SIM card 落部手機，即刻發現有好多miss call，係同一個電話打咗好多次俾我地，仲有一個留言，原來就係 No.1 間幼兒園打黎要通知我地有位俾佢讀，但係已經過咗 deadline 喇。第二日脆脆地打翻去問下啦，嘩！原來佢地仲留住個位俾我地。佢地知道咗我地唔响台灣，叫我地翻去登記翻就得架嘞。好感動呀！真係好有人情味呀。
（大家有興趣的話，可以參考下「臺北市109學年度公立幼兒園招收簡章」，了解下詳情。）
翻到台灣後，我地即刻帶齊啲文件去學校註冊，幼兒園主任順便介紹一下間幼兒園嘅辦學理念，我同熱血太太都聽到雙眼發光，簡直就是發現了一個寶藏（我雙眼可能光啲，因為呀主任都幾靚女）。咁啱得咁橋，哩間幼兒園嘅教學理念同我地嘅不謀而合。上課時間表顯示，每日翻到學校，就係遊戲訓練大肌肉，食點心，主題教學，午餐，午睡，遊戲，下午茶⋯⋯學習內容以幼兒嘅發展階段為本，學習自理能力，冇過早去教寫字。園主任驚我地唔鍾意，事先聲明間幼兒園唔教注音符號，唔教英文字母，我地就話正呀！每班有30個學生，全日都有兩個老師照顧。伙食學費雜費加加埋埋仲呵呵呵，平到震，一個學期嘅學費仲少過啲私立幼兒園一個月嘅學費呀！對於一啲中低收入家庭，仲可以再補貼減免。細路可以揀翻半日，半日加午餐，或者全日。全日嘅下午4:00放學。如果屋企冇人湊，幼兒園裡面有需要嘅家長仲可以夾錢包個課後照顧班，幼兒園繼續提供場地，幫你湊到6:00。翻學時間都好彈性嘅，雖然8:20先至正式上課（其實就係運動時間），要早翻工嘅家長7:30就可以送啲BB入其中一個課室，會有老師睇住先。所以，台灣係可以唔使請家傭幫手湊細路嘅，我覺得咁樣嘅社會安排先至合理。菲傭印傭離開家人，就只要湊一個BB，一個跟一個。其實應該由一個大人湊幾個BB，咁先至有效益，啲BB有伴，亦都會開心啲。
升到小學仲有冇課後照顧呢？好似有，不過就算冇，都有一啲私立叫「安親班」嘅服務，放學時安親班嘅職員就會去學校門口接放學，帶啲同學去安親班繼續照顧，等父母放工黎湊番屋企。學校亦都會配合安排，為免混亂，每個安親班都會分配去唔同嘅位置等學生，實行無縫交接。見倒都唔少香港家長問可唔可以在台灣請外傭幫手湊仔，答案係：好難架。有錢都未必請倒，要計分嘅。因為台灣係有提供解決雙職家庭照顧兒童嘅方案。
學校要提供餐點，咁啲食物點黎嘅呢？有啲會訂外賣，有啲就自己有廚房，有廚師，現場製作。No.1 間學校就有自己嘅廚房，喺哩一區出咗名好味，一日三餐，早點、午餐、午點，仲有監廚制度添。家長有興趣可以去廚房幫下手，順便留意一下廚房嘅衛生條件，食物嘅質素，煮熟咗仲可以試食添。學校每個月都會派份菜單俾家長，等家長知道細路食咗啲乜，煮晚餐時亦可以避免煮翻相同嘅餸菜。講開又講，其實法國都係咁架。
幼兒園午餐菜單 
幼兒園早點、午點菜單
開學前第一天，學校會安排一個家長陪讀日，一個家長陪住個BB翻一日學，幫助啲BB適應新環境。對家長亦都有幫助架，呵呵，我相信都會有家長會唔捨得個BB，唔放心架。上完陪讀日後，No. 1 係威係勢咁同呀媽講話佢唔使人陪架啦，第二日就可以自己翻學架啦。我地驚佢適應唔黎，淨係幫佢報咗半日班加午餐。正式翻學第一日，順利放低佢，我地就走人，五個鐘頭翻去接佢時，原來有喊爆幾次。第一次同屋企人分開咁耐，係咁架啦。老師都好有經驗處理哩啲情況，所以好快就已經開開心心返學無再喊喇。
學校同屋企隔一條巷，每日翻學行10分鐘就到，家長身上要掛張接送證，好似啲 Visitor Pass 咁，帶住個BB入校園，去到課室門口就要啲細路自己換鞋，入到課室後要佢自己放好水壺書包等等，每一個細節都要培養BB嘅自理能力。No. 1 翻咗兩個月學，就會幫自己裝湯。我有時會見到啲高班嘅哥哥姐姐洗抺布，應該係啲值日生黎。除咗學生要當值日生，家長都可以幫手清潔校園架，每隔兩三個星期，學校就會吹雞叫人幫手，不過都係自願性質嘅。有次老師仲叫熱血太太幫手睇住啲BB午睡，等老師可以開會。講開午睡，每個BB要帶自己睡袋翻學，午睡時先攞出來鋪地下，瞓醒就收翻埋落個 Locker 入面，每兩星期帶翻屋企洗一次，如果賴尿就另計啦。唔知點解，啲老師總係有神奇力量可以令到啲BB乖乖瞓低唔出聲瞓著覺。
除咗每日在學校嘅生活，間中都會去下啲校外嘅活動，例如春秋兩季旅行，亦都會有請埋家長參加嘅 Party，例如農曆新年前就有個慶祝活動，每個細路帶一個家長，仲有帶一啲食物，去到學校一齊食。嫲嫲咁鍾意細路，就梗係派佢去啦。不過之後武漢肺炎疫情爆發，要避免感染，哩啲活動就取消曬囉。台灣因應疫情，將寒假延長兩星期，暑假就相應縮短返。有得翻學真係好幸福呀！我係話我同熱血太太幸福呀。每日送完No.1 翻學，No.2 俾嫲嫲湊，我地就自由囉，可以做多啲公司嘢。你話係唔係守得雲開見月明呢！
講完嘞。最後講一講，大家可能奇怪我哩個 Hea 人點解對間公司咁上心。我地算係早些少投資移民台灣嘅個案，當時要求好寬鬆，而且我地兩年前已經攞咗身分證。好多人，包括我自己，都有諗過為咗滿足移民要求鳩鳩地做一年算數，不過鳩鳩地做，純粹想過骨，其實會好影響心情，成日擔驚受怕申請定居攞身份證時會唔批，不如珍惜哩個機會認認真真做，唔使擔心移民署唔批，又可以學識營運生意新技能，仲可以貢獻台灣經濟。在台灣養起自己一家人，咁至算真正移民成功架麻。台灣營商環境唔錯架，政府廉潔有效率，高度嘅新聞資訊自由，物流發達，資金流動自由，人工便宜，產業多樣化，雖然本地大眾對價格敏感，但亦不乏高消費能力嘅一群，有得做嘅！講到哩度真係要停嘞，再講落去就太離題，下次再講啦。
(Photo by Joshua Eckstein on Unsplash)